ആറ്റുകാൽ പൊങ്കാലയും വരാനിരിക്കുന്ന തിരഞ്ഞെടുപ്പും പ്രമാണിച്ച് തിരുവനന്തപുരം നഗരത്തിൽ പോലീസിന്റെ വ്യാപക ഗുണ്ടാ വേട്ട. കുപ്രസിദ്ധ ഗുണ്ടാനേതാവ് ഓംപ്രകാശ് ഉൾപ്പെടെ 16 പ്രമുഖ ക്രിമിനലുകളെ പോലീസ് പിടികൂടി. സിറ്റി പോലീസ് കമ്മീഷണറുടെ നേരിട്ടുള്ള മേൽനോട്ടത്തിൽ തലസ്ഥാന നഗരിയുടെ വിവിധ ഭാഗങ്ങളിൽ നടത്തിയ മിന്നൽ പരിശോധനയിലാണ് ഇവരെ കരുതൽ തടങ്കലിൽ എടുത്തത്.
വിവിധ ക്രിമിനൽ കേസുകളിൽ പ്രതികളായ 82 പേരെയാണ് പ്രത്യേക പരിശോധനയുടെ ഭാഗമായി പോലീസ് വലയിലാക്കിയത്. നഗരത്തിലെ ക്രമസമാധാന നില തകർക്കാൻ സാധ്യതയുള്ളവരുടെ പട്ടിക തയ്യാറാക്കിയായിരുന്നു നടപടി. പിടിയിലായവരിൽ പലരും കാപ്പ (KAAPA) നിയമപ്രകാരം നടപടി നേരിട്ടവരും ഒട്ടേറെ വധശ്രമക്കേസുകളിൽ പ്രതികളുമാണ്. വരും ദിവസങ്ങളിലും കർശന പരിശോധന തുടരുമെന്ന് പോലീസ് അറിയിച്ചു.
ഉത്സവകാലത്തും തിരഞ്ഞെടുപ്പ് വേളയിലും ഉണ്ടാകാനിടയുള്ള അക്രമ സംഭവങ്ങൾ മുൻകൂട്ടി തടയുക എന്ന ലക്ഷ്യത്തോടെയാണ് ‘ഓപ്പറേഷൻ ആഗ്’ മാതൃകയിലുള്ള ഈ നീക്കം. പിടിയിലായവരുടെ പശ്ചാത്തലം പരിശോധിച്ചു വരികയാണെന്നും ഗുണ്ടാ പ്രവർത്തനങ്ങൾ അമർച്ച ചെയ്യാൻ വിട്ടുവീഴ്ചയില്ലാത്ത നടപടികൾ സ്വീകരിക്കുമെന്നും സിറ്റി പോലീസ് കമ്മീഷണർ വ്യക്തമാക്കി.
Police crackdown on gangs in Thiruvananthapuram; Om Prakash among 82 arrested
