ന്യൂഡൽഹി: എയർ ഇന്ത്യയുടെ ആദ്യത്തെ വൈഡ് ബോഡി വിമാനം എ350 ശനിയാഴ്ച ഡൽഹി വിമാനത്താവളത്തിൽ എത്തി. ഇതോടെ രാജ്യത്ത് എ350 വിമാനം അവതരിപ്പിക്കുന്ന ആദ്യ എയര്‍ലൈനായിരിക്കുകയാണ് ടാറ്റ ഗ്രൂപ്പിന്റെ ഉടമസ്ഥതയിലുള്ള എയര്‍ ഇന്ത്യ.
ഫ്രാന്‍സിലെ എയര്‍ബസ് നിര്‍മ്മാണശാലയില്‍ നിന്ന് പുറപ്പെട്ട VT-JRA എന്ന രജിസ്‌ട്രേഷനിലുള്ള വിമാനം ശനിയാഴ്ച ഉച്ചയ്ക്ക് 01:46-നാണ് ഡല്‍ഹി വിമാനത്താവളത്തിന്റെ റണ്‍വേയില്‍ ഇറങ്ങിയത്. യൂറോപ്യന്‍ കമ്പനിയായ എയര്‍ബസിന് 250 വിമാനങ്ങള്‍ക്കുള്ള ഓര്‍ഡറാണ് എയര്‍ ഇന്ത്യ നല്‍കിയത്. ഇതില്‍ ആദ്യവിമാനമാണ് ഇപ്പോള്‍ എത്തിയത്.
എ350-900 വൈഡ് ബോഡി വിമാനം ജനുവരിയില്‍ സര്‍വ്വീസ് ആരംഭിക്കും. ആദ്യഘട്ടത്തില്‍ ആഭ്യന്തര റൂട്ടിലെ സര്‍വ്വീസിനായാണ് ഈ വിമാനം ഉപയോഗിക്കുക. പിന്നീട് വിമാനം ദീര്‍ഘദൂര അന്താരാഷ്ട്ര സര്‍വ്വീസുകള്‍ക്കായി ഉപയോഗിക്കും. പുതിയ വിമാനത്തിന്റെ ഷെഡ്യൂള്‍ വരുന്ന ആഴ്ചകളില്‍ പുറത്തുവിടുമെന്നാണ് എയര്‍ ഇന്ത്യ വൃത്തങ്ങള്‍ പറയുന്നത്.
ഓര്‍ഡര്‍ ചെയ്ത 250 എണ്ണത്തില്‍ 20 എണ്ണം എ350-900 വൈഡ് ബോഡി വിമാനങ്ങളാണ്. ഇതിന് പുറമെ 20 എ350-1000 വിമാനങ്ങളും 210 എ320 നിയോ നാരോബോഡി വിമാനങ്ങളുമാണ് എയര്‍ ഇന്ത്യ ഓര്‍ഡര്‍ ചെയ്തത്. അടുത്ത മാര്‍ച്ച് മാസത്തില്‍ അഞ്ച് എ350-900 വൈഡ് ബോഡി വിമാനങ്ങള്‍ കൂടി എയര്‍ ഇന്ത്യയ്ക്കായി എത്തും.
