മലയാളത്തിന് വന്‍ നിരാശ്ശ നല്‍കി ഓസ്‌കര്‍ പുരസ്‌കാരത്തിനുള്ള ഇന്ത്യയുടെ ഒഫിഷ്യല്‍ എന്‍ട്രിയായ ‘2018’പുറത്ത്. ഏറെ പ്രതീക്ഷയോടെ ഓസ്‌കറിനായി കാത്തിരുന്ന ചിത്രത്തിന് അന്തിമ ചുരുക്കപ്പട്ടികയില്‍ ഇടം നേടാനായില്ല. 15 സിനിമകള്‍ ഉള്‍പ്പെടുന്ന രണ്ടാം ഘട്ടത്തിലേക്ക് ചിത്രം തിരഞ്ഞെടുക്കപ്പെട്ടില്ല. ‘എവരിവണ്‍ ഈസ് എ ഹീറോ’ എന്ന ഉപശീര്‍ഷകത്തോടെ, 2018-ലെ കേരളത്തെ തകര്‍ത്ത പ്രളയത്തെ കേന്ദ്രമാക്കി ജൂഡ് ആന്റണി ജോസഫ് ഒരുക്കിയ ചിത്രമാണ് 2018.
കാലാവസ്ഥാ വ്യതിയാനത്തിന്റെ പ്രത്യാഘാതങ്ങള്‍ പ്രമേയമാക്കിയാണ് ഓസ്‌കാര്‍ നോമിനേഷനു വേണ്ടി 2018 തിരഞ്ഞെടുത്തതെന്ന് ചലച്ചിത്ര നിര്‍മ്മാതാവും 16 അംഗ സെലക്ഷന്‍ കമ്മിറ്റി ചെയര്‍മാനുമായ ഗിരീഷ് കാസറവള്ളി നേരത്തേ പറഞ്ഞിരുന്നു. അന്താരാഷ്ട്ര ഫീച്ചര്‍ ഫിലിം വിഭാഗത്തിലാണ് ചിത്രം ഓസ്‌കാറിനായി മത്സരിക്കാന്‍ തയ്യാറെടുത്തത്. 2002-ല്‍ ലഗാന് ശേഷം ഓസ്‌കാറില്‍ മികച്ച അന്താരാഷ്ട്ര ഫീച്ചര്‍ ചിത്രമായി ഒരു ഇന്ത്യന്‍ എന്‍ട്രിയും നാമനിര്‍ദ്ദേശം ചെയ്യപ്പെട്ടിരുന്നില്ല.
അതേസമയം ടൊവിനൊ തോമസ്, ആസിഫ് അലി കുഞ്ചാക്കോ ബോബന്‍, തുടങ്ങിയര്‍ പ്രധാന വേഷത്തിലെത്തിയ 2018 ബോക്‌സ് ഓഫീസ് ഹിറ്റായിരുന്നു. മലയാളത്തില്‍ നിന്ന് ആദ്യമായി 200 കോടി ക്ലബില്‍ എത്തിയ ചിത്രം കൂടിയാണ്. സാങ്കേതികത്തികവോടെ കേരളത്തിന്റെ നേര്‍ അനുഭവങ്ങള്‍ സിനിമയിലേക്ക് പകര്‍ത്തിയപ്പോള്‍ 2018 വന്‍ വിജയമായി മാറി. കലാപരമായും മികച്ചുനിന്നു 2018. ബോക്‌സ് ഓഫീസില്‍ 2018 പല കളക്ഷന്‍ റെക്കോര്‍ഡുകളും ഭേദിച്ച് മലയാളത്തിന്റെ ഒന്നാം സ്ഥാനത്ത് എത്തുകയും ചെയ്തു.
അതേസമയം ചിത്രത്തെത്തേടി വിവാദങ്ങളുമെത്തിയിരുന്നു. കേരളം നേരിട്ട പ്രളയം പശ്ചാത്തലമാക്കി സിനിമയൊരുക്കിയപ്പോള്‍ പ്രളയ സമയത്ത് രക്ഷാപ്രാവര്‍ത്തനം ഏകോപിപ്പിച്ച സര്‍ക്കാര്‍ അടക്കമുള്ള ഘടകങ്ങളെ ‘2018’ല്‍ വേണ്ടവിധം പരാമര്‍ശിക്കുന്നില്ല എന്ന വിമര്‍ശനം ഉയര്‍ന്നിരുന്നു. തെലുങ്കില്‍ 2018 നേടിയത് 10 കോടിയില്‍ അധികമാണ് എന്നാണ് റിപ്പോര്‍ട്ട്. തമിഴിലും കന്നഡയിലും ഹിന്ദിയിലും 2018 സിനിമ മൊഴിമാറ്റി പ്രദര്‍ശനത്തിന് എത്തിയിരുന്നു. സോണി ലിവിലാണ് 2018ന്റെ സ്ട്രീമിംഗ്.
ടൊവിനോ തോമസിനും ആസിഫ് അലിക്കും കുഞ്ചാക്കോ ബോബനും പുറമേ നരെയ്ന്‍, ലാല്‍, വിനീത് ശ്രീനിവാസന്‍, സുധീഷ്, അജു വര്‍ഗീസ്, അപര്‍ണ ബാലമുരളി, തന്‍വി റാം, ശിവദ, ഗൗതമി നായര്‍, സിദ്ദിഖ്, രണ്‍ജി പണിക്കര്‍, ജനാര്‍ദനന്‍, രമേഷ് തിലക്, വിനിത ജോഷി, ജി സുരേഷ് കുമാര്‍, റോണി ഡേവിഡ്, കലാഭവന്‍ ഹനീഫ് തുടങ്ങി വന്‍ താരനിരയാണ് ‘2018’ല്‍ വേഷമിട്ടത്. തിരക്കഥയില്‍ അഖില്‍ ധര്‍മജനും പങ്കാളിയാണ്. ഛായാഗ്രാഹണം അഖില്‍ ജോര്‍ജായിരുന്നു.
