ന്യൂഡൽഹി: റിപ്പബ്ലിക് ദിനാഘോഷത്തിൽ മുഖ്യാതിഥിയായി പങ്കെടുക്കാൻ യുഎസ് പ്രസിഡന്റ് ജോ ബൈഡൻ അടുത്ത മാസം ഇന്ത്യയിലെത്തിയേക്കില്ലെന്ന് റിപ്പോർട്ടുകൾ. 2024 ജനുവരി 26ലെ റിപ്പബ്ലിക് ദിനത്തിലേക്ക് ജോ ബൈഡനെ പ്രധാനമന്ത്രി നരേന്ദ്ര മോദി ക്ഷണിച്ചിരുന്നു.
ഈ സാഹചര്യത്തില്‍ നേരത്തെ നിശ്ചയിച്ചതു പ്രകാരം നാലു രാജ്യങ്ങളുടെ കൂട്ടായ്മയായ ക്വാഡ് ഉച്ചകോടിയും ജനുവരിയില്‍ നടക്കാന്‍ സാധ്യതയില്ല. അടുത്ത ക്വാഡ് സമ്മേളനം ജനുവരി 27ന് നടത്താനായിരുന്നു ഇന്ത്യയുടെ പദ്ധതി. ഇന്ത്യയെ കൂടാതെ ഓസ്ട്രേലിയ, ജപ്പാൻ, യുഎസ് തുടങ്ങിയ രാജ്യങ്ങളും സമ്മേളനത്തിൽ പങ്കെടുക്കുമെന്നായിരുന്നു നേരത്തെ ലഭിച്ചിരുന്ന വിവരം.
ക്വാഡ് ഉച്ചകോടി ജനുവരിയില്‍ ഇന്ത്യയില്‍ നടക്കില്ലെന്നും 2024 അവസാനത്തോടെ നടത്താനാണ് ഇപ്പോള്‍ ആലോചിക്കുന്നതെന്നും വാർത്താ ഏജൻസിയായ പി.ടി.ഐ റിപ്പോർട്ടു ചെയ്തു.
പ്രധാനമന്ത്രി നരേന്ദ്ര മോദി റിപ്പബ്ലിക് ദിനാഘോഷത്തില്‍ അതിഥിയായി പ്രസിഡന്റ് ബൈഡനെ ക്ഷണിച്ചിട്ടുണ്ടെന്ന് സെപ്തംബറില്‍ ഇന്ത്യയിലെ യുഎസ് അംബാസഡര്‍ എറിക് ഗാര്‍സെറ്റിയാണ് പറഞ്ഞിരുന്നത്. എന്നാല്‍ ഇതുസംബന്ധിച്ച് ഇന്ത്യ പ്രതികരിച്ചിരുന്നില്ല.
