തിരുവനന്തപുരം: മന്ത്രി കെ രാധാകൃഷ്ണന്റെ പ്രൈവറ്റ് സെക്രട്ടറി സ്ഥാനത്ത് നിന്ന് മുന്‍ എംപിയും സിപിഎം നേതാവുമായ എ സമ്പത്തിനെ മാറ്റി. മന്ത്രിയുടെ അതൃപ്തിയെ തുടര്‍ന്നാണ് സമ്പത്തിനെ നീക്കിയതെന്നാണ് വിവരം. മന്ത്രി കെ രാധാകൃഷ്ണനും എ സമ്പത്തും തമ്മില്‍ ദീര്‍ഘനാളായി അഭിപ്രായഭിന്നതയുണ്ടായിരുന്നു. ഇക്കാര്യം മന്ത്രി വെളിപ്പെടുത്തിയതിനെത്തുടര്‍ന്നാണ് സമ്പത്തിന്റെ സ്ഥാനമാറ്റം.
സമ്പത്തിനെ സംഘടന രംഗത്തേക്ക് മാറ്റാനാണ് സിപിഎം തീരുമാനം. സമ്പത്തിനു പകരം കേരളാ ഗസറ്റഡ് ഓഫീസേര്‍സ് അസോസിയേഷന്‍ നേതാവായിരുന്ന കെ ശിവകുമാറിനെ പ്രൈവറ്റ് സെക്രട്ടറിയായി നിയമിച്ചു. മൂന്ന് തവണ ആറ്റിങ്ങല്‍ എംപിയായിരുന്ന എ സമ്പത്ത് 2019 ലെ തെരഞ്ഞെടുപ്പില്‍ അടൂര്‍ പ്രകാശിനോട് തോല്‍ക്കുകയായിരുന്നു. തുടര്‍ന്ന് ദില്ലിയില്‍ സംസ്ഥാന സര്‍ക്കാരിന്റെ ഓഫീസര്‍ ഓണ്‍ സ്‌പെഷല്‍ ഡ്യൂട്ടിയായി പോയി. മന്ത്രി കെ രാധാകൃഷ്ണന്റെ പ്രൈവറ്റ് സെക്രട്ടറിയായിട്ടായിരുന്നു പിന്നീടുള്ള നിയമനം.
