തൃശൂര്: ജനുവരി രണ്ടിന് പ്രധാനമന്ത്രി നരേന്ദ്രമോദി കേരളത്തിലെത്തുമെന്ന് ബിജെപി സംസ്ഥാന അധ്യക്ഷന് കെ സുരേന്ദ്രന്. തൃശ്ശൂര് തേക്കിന്കാട് മൈതാനത്ത് നടക്കുന്ന സ്ത്രീ ശക്തി സംഗമത്തില് പ്രധാനമന്ത്രി പങ്കെടുക്കും. പാര്ലമെന്റില് വനിതാ സംവരണ ബില് പാസാക്കിയതിനുശേഷം ബിജെപി ദേശീയ തലത്തില് നടത്തുന്ന ആദ്യത്തെ സമ്മേളനമാണ് തൃശൂരില് നടക്കുന്നത്. രണ്ട് ലക്ഷത്തോളം സ്ത്രീകള് പ്രസ്തുത പരിപാടിയില് പങ്കെടുക്കുമെന്നും കെ സുരേന്ദ്രന് പറഞ്ഞു.
വനിതാബില് പാസാക്കിയ പ്രധാനമന്ത്രിക്ക് അഭിനന്ദനമറിയിക്കുയാണ് സമ്മേളനത്തിന്റെ പ്രധാന അജണ്ട. അങ്കണവാടി ടീച്ചര്മാര്, ആശാ വര്ക്കര്മാര്, തൊഴിലുറപ്പ് തൊഴിലാളികള്, കുടുംബശ്രീ പ്രവര്ത്തകര്, വനിതാ സംരംഭകര്, സാമൂഹിക പ്രവര്ത്തകര്, സാംസ്കാരിക രംഗത്ത് പ്രവര്ത്തിക്കുന്ന സ്ത്രീകള്, തെരഞ്ഞെടുക്കപ്പെട്ട തദ്ദേശഭരണ സ്ഥാപനങ്ങളിലെ അംഗങ്ങള് തുടങ്ങി വ്യത്യസ്ത വിഭാഗം സ്ത്രീകളെ പങ്കെടുപ്പിച്ചാണ് പരിപാടി നടത്തുക
