ന്യൂഡല്ഹി: രാജ്യത്തെ ഞെട്ടിച്ചുകൊണ്ട് പുറത്തുവന്ന പാര്ലമെന്റ് സുരക്ഷാ വീഴ്ചയ്ക്കിടയാക്കിയ സംഭവത്തില്, ഡല്ഹി പൊലീസ് തീവ്രവാദ വിരുദ്ധ നിയമപ്രകാരം കേസെടുത്തു.
ഇന്നലെ പാര്ലമെന്റ് ഭീകരാക്രമണത്തിന്റെ 22-ാം വാര്ഷികത്തില് അടിയന്തര പൊതു പ്രാധാന്യമുള്ള കാര്യങ്ങള് സഭ ചര്ച്ച ചെയ്യുന്നതിനിടെയാണ് സംഭവം. ബിജെപി എംപി ഖാഗന് മുര്മു സംസാരിക്കുന്നതിനിടെയാണ് നുഴഞ്ഞുകയറ്റക്കാര് സഭയിലേക്ക് ചാടി ബഹളം സൃഷ്ടിച്ചത്. ഉടന് തന്നെ സഭ 2 മണിവരെ നിര്ത്തിവച്ചു.
നുഴഞ്ഞുകയറ്റക്കാരുടെ ഉദ്ദേശ്യവും മറ്റ് വിവരങ്ങളും അന്വേഷിക്കാന് നിയമവിരുദ്ധ പ്രവര്ത്തനങ്ങള് തടയല് നിയമപ്രകാരം ഡല്ഹി പോലീസ് സ്പെഷ്യല് സെല് കേസെടുത്തു. ലോക്സഭാ സെക്രട്ടേറിയറ്റിന്റെ അഭ്യര്ഥന മാനിച്ച് ആഭ്യന്തര മന്ത്രാലയവും (എംഎച്ച്എ) സുരക്ഷാ വീഴ്ചയെക്കുറിച്ച് ഉന്നതതല അന്വേഷണത്തിന് ഉത്തരവിട്ടിട്ടുണ്ട്.
സിആര്പിഎഫ് ഡിജി അനീഷ് ദയാല് സിംഗിന് കീഴില് മറ്റ് സുരക്ഷാ ഏജന്സികളില് നിന്നുള്ള അംഗങ്ങളും വിദഗ്ധരുമായി എംഎച്ച്എ ഒരു അന്വേഷണ സമിതി രൂപീകരിച്ചു. സുരക്ഷാ വീഴ്ചയുടെ കാരണങ്ങള് അന്വേഷിക്കുകയും പോരായ്മകള് കണ്ടെത്തുകയും തിരുത്തല് നടപടികള് നിര്ദ്ദേശിക്കുകയും ചെയ്യും. പാര്ലമെന്റിന്റെ സുരക്ഷ മെച്ചപ്പെടുത്തുന്നതിനുള്ള ശുപാര്ശകള് അടങ്ങിയ റിപ്പോര്ട്ട് സമിതി എത്രയും വേഗം സമര്പ്പിക്കുമെന്ന് എംഎച്ച്എ വക്താവ് ‘എക്സില്’ പറഞ്ഞു.
