തിരുവനന്തപുരം: കൊല്ലം ഓയൂരില് കാറിലെത്തി കുട്ടിയെ തട്ടികൊണ്ട് പോയി എന്ന് സംശയിക്കുന്ന സ്ത്രീയുടെ രേഖാ ചിത്രം പോലീസ് പുറത്തു വിട്ടു. ഓയൂരില് നിന്ന് ആറുവയസുകാരി അബിഗേലിനെ തട്ടിക്കൊണ്ടുപോയതിനു മുന്പ് സമീപപ്രദേശത്ത് നിന്ന് മറ്റൊരു കുട്ടിയേയും തട്ടിക്കൊണ്ടു പോകാന് ശ്രമം നടന്നിരുന്നു. ഈ രണ്ടു സംഭവങ്ങളും തമ്മില് ബന്ധമുണ്ടോ എന്ന് പൊലീസ് പരിശോധിക്കുന്നുണ്ട്. ഓയൂരില് നിന്ന് പത്ത് കിലോമീറ്റര് മാത്രം അകലെയുള്ള മറ്റൊരു സ്ഥലത്ത് നിന്നാണ് കുട്ടിയെ തട്ടിക്കൊണ്ടു പോകാന് ശ്രമിച്ചത്.
സംഘംമുക്ക് താന്നിവിള പനയ്ക്കല് ജംഗ്ഷനില് സൈനികനായ ആര് ബിജുവിന്റെയും ചിത്രയുടെയും വീട്ടിലാണ് അജ്ഞാതര് എത്തിയത്. വീടിനകത്തുണ്ടായിരുന്ന ബിജുവിന്റേയും ചിത്രയുടേയും മകള് സിറ്റൗട്ടിലേക്ക് എത്തിയപ്പോഴാണ് വീടിന് മുന്നില് ചുരിദാര് ധരിച്ച ഒരു സ്ത്രീ മുഖം മറച്ചു നില്ക്കുന്നതു കണ്ടത്. ആരാണെന്നു ചോദിച്ചപ്പോള് സ്ത്രീ പെട്ടെന്നു ഗേറ്റ് കടന്ന് ഓടി സമീപത്ത് ബൈക്കില് കാത്തുനിന്ന ആളോടൊപ്പം കടന്നു കളഞ്ഞുവെന്നാണ് പന്ത്രണ്ടു വയസ്സുകാരി പറഞ്ഞത്. ഈ സംഭവം പെണ്കുട്ടിയുടെ അമ്മ വൈകീട്ട് സാമൂഹിക മാധ്യമത്തില് പോസ്റ്റിട്ടിരുന്നു. ഇതിനു കൃത്യം ഒരു മണിക്കൂറിനു ശേഷമാണ് ഓയൂരില് അബിഗേലിനെ തട്ടിക്കൊണ്ടുപോയത്.
ഈ സ്ത്രീയുടെ രേഖാചിത്രമാണ് പൊലീസ് ഇപ്പോള് പുറത്തുവിട്ടിരിക്കുന്നത്. ഇരു സംഭവങ്ങളിലും ഉള്പ്പെട്ടിരിക്കുന്നത് ഒരേ സ്ത്രീയാണോ എന്ന് പൊലീസ് പരിശോധിക്കുന്നുണ്ട്. അതേസമയം തട്ടിക്കൊണ്ടുപോയ സംഘം കുട്ടിയെ ഉപേക്ഷിച്ച് മണിക്കൂറുകള് കഴിഞ്ഞിട്ടും പോലീസിന് പ്രതികളെ കണ്ടെത്താനായിട്ടില്ല. പ്രതികളെ കണ്ടെത്താന് പ്രത്യേക അന്വേഷണ സംഘം രൂപീകരിച്ചിട്ടുണ്ട്. ഡിഐ ജി നിശാന്തിനി അന്വേഷണത്തിന് മേല്നോട്ടം വഹിക്കും.
