ഇന്ത്യ പ്രസ് ക്ലബ് ഓഫ് നോര്‍ത്ത് അമേരിക്കയുടെ അറ്റ്ലാന്റ ചാപ്റ്ററിന്റെ പത്താമത് ചാപ്റ്ററിന് പ്രൗഢഗംഭീരമായ തുടക്കം. ഐ പി സി എന്‍ എ അറ്റ്ലാന്റ ചാപ്റ്റര്‍ പ്രസിഡന്റും പ്രവാസി ചാനൽ റീജിയണൽ ഡയറക്ടറുമായ കാജൽ സക്കറിയയാണ് പരിപാടിക്ക് അധ്യക്ഷത വഹിച്ചത്. പ്രമുഖ സാമൂഹിക സാംസ്‌കാരിക നേതാക്കളുടെ സാന്നിധ്യം ചടങ്ങിനെ ഗംഭീരമാക്കി. ഐ പി സി എന്‍ എ നാഷണല്‍ പ്രസിഡന്റ് സുനില്‍ ട്രൈസ്റ്റാര്‍, അഡ്വൈസറി ബോർഡ് ചെയർമാൻ സുനിൽ തൈമറ്റം, നാഷണൽ സെക്രട്ടറി ഷിജോ പൗലോസ്, നാഷണൽ ട്രെഷറർ വിശാഖ് ചെറിയാന്‍, ആദ്യ പ്രസിഡൻ്റ് ജോർജ് ജോസഫ് എന്നിവരെ കൂടാതെ വിശിഷ്ടാതിഥികളായി സെനറ്റർ ജോൺ ഓസോഫിന്റെ സെക്രട്ടറി കിയാന പെർക്കിൻസ്, റിട്ടയേർഡ് ദൂരദർശൻ ഡയറക്ടർ ദിലീപ് അബ്ദുല്ല എന്നിവരും പരിപാടിയിൽ പങ്കെടുത്തു.
അറ്റ്ലാന്റ മാർത്തോമാ ഓഡിറ്റോറിയത്തിൽ നവംബർ 9 ന് നടന്ന ചടങ്ങിലാണ് ചാപ്റ്ററിനു ഔദ്യോഗിക തുടക്കം കുറിക്കുന്നതായി നാഷണൽ പ്രസിഡന്റ് സുനിൽ ട്രൈസ്റ്റാർ പ്രഖ്യാപിച്ചത്. അഡ്വൈസറി ബോർഡ് ചെയർമാൻ സുനിൽ തൈമറ്റം നടത്തിയ പ്രസംഗത്തിൽ മാധ്യമ രംഗത്ത് നവീന നയപരിപാടികൾ പ്രഖ്യാപിക്കുകയും, കുറഞ്ഞ സമയത്തിനുള്ളിൽ അത് നടപ്പിലാക്കി അതിവേഗം ജനപ്രിയമായി മുന്നേറുന്ന മാതൃകാ ചാപ്റ്ററായി അറ്റ്ലാന്റ മാറട്ടെ എന്ന് അദ്ദേഹം ആശംസിച്ചു. അറ്റ്ലാന്റ ചാപ്റ്ററിന്റെ പ്രവർത്തനോത്ഘാടനം ജനപങ്കാളിത്തംകൊണ്ട് വൻവിജയമായതിൽ നാഷണൽ സെക്രട്ടറി ഷിജോ പൗലോസും നാഷണൽ ട്രെഷറർ വിശാഖ് ശാഖ് ചെറിയാനും ജോർജ് ജോസെഫും സന്തോഷം പ്രകടിപ്പിച്ചു. അസാധാരണമായ ദീർഘവീക്ഷണവും, സൂക്ഷ്മമായ ആസൂത്രണവും ഉറപ്പാക്കാൻ സാധിച്ചതിലുള്ള സന്തോഷവും ചാപ്റ്റർ ഉത്ഘാടനം വൻ വിജയമാക്കിയതിനുള്ള കടപ്പാടും ചാപ്റ്റർ പ്രസിഡന്റ് കാജൽ സക്കറിയ അറിയിക്കുകയുണ്ടായി.
കിയാന പേർക്കിൻസ് തന്റെ പ്രസംഗത്തിൽ അറ്റ്ലാന്റയിലെ മാധ്യമ പ്രവർത്തകരുടെയും ജനങ്ങളുടെയും എന്താവശ്യത്തിനും താൻ ഉണ്ടാകും എന്നറിയിച്ചു. നാല് പതിറ്റാണ്ടോളം ദൃശ്യമാധ്യമരംഗത്തെ സേവനത്തിനു ശേഷം വിരമിച്ച റിട്ടയേർഡ് ദൂരദർശൻ ഡയറക്ടർ ദിലീപ് അബ്ദുല്ല തന്റെ പ്രസംഗത്തിൽ ഇത് ഒരു പുതിയ അനുഭവമാണെന്നും യാദൃച്ഛികമായാണ് ഇതിൽ പങ്കെടുത്തതെങ്കിലും അമേരിക്കയിലെ മലയാളികളുടെ മാധ്യമപ്രവർത്തനം പ്രശംസയർഹിക്കുന്നതാണെന്നും പറഞ്ഞു. എല്ലാവരും മുഴുവൻ സമയ മാധ്യമ പ്രവർത്തകരല്ലെങ്കിലും ആത്മാർഥമായ മാധ്യമപ്രവർത്തനം നടത്തുന്നതിനുള്ള ശ്രമങ്ങൾ ഒരിക്കലും മറക്കരുതെന്നും പ്രസ് ക്ലബിന് എല്ലാ വിധ ആശംസകളും നേരുന്നതായി അദ്ദേഹം അറിയിച്ചു.
നിഷ്പക്ഷമായ ഒരു മാധ്യമസംസ്കാരം പടുത്തുയർത്തുകയെന്ന വലിയ ദൗത്യത്തിലേക്കുള്ള കാൽവെപ്പിലേക്ക് ഒത്തുചേർന്ന എല്ലാ മാധ്യമപ്രവർത്തകരേയും, സംഘടനകളെയെയും, സുഹൃത്തുക്കളെയെയും, കുടുംബാംഗങ്ങളേയും ചാപ്റ്റർ സെക്രട്ടറി ബിനു കാസിം സ്വാഗതം ചെയ്‌തു. ചടങ്ങിന് മോടി കൂട്ടിയ കലാപരിപാടിക്ക് പ്രത്യേക നന്ദി അറിയിക്കുന്നതായി പരിപാടികൾക്കു ചുക്കാൻ പിടിച്ച വൈസ് പ്രസിഡന്റ് ഷൈനി അബൂബക്കറും കമ്മിറ്റി അംഗം ഫെമി നാസറും, അനു ഷിബുവും അറിയിച്ചു. ചടങ്ങിനെ നിർലോഭമായി സഹായിച്ച എല്ലാവർക്കും ജോയിന്റ് സെക്രട്ടറി അനു ഷിബു നന്ദി അറിയിച്ചു.
മലയാളീസ് ഇൻ അമേരിക്ക (മിയ മിയ) എന്നപേരിൽ ജനശ്രദ്ധ നേടിയ നവമാധ്യമത്തിന്റെ ശില്പിയായ അറ്റ്ലാന്റ ചാപ്റ്റർ ട്രെഷറർ തോമസ് ജോസെഫിന്റെ ആശയത്തിൽ ഉരുത്തിരിഞ്ഞ ജോർജിയ ഗൈഡ്സ്റ്റോൺസിനെ ആസ്പദമാക്കിയുള്ള “മാനവികതയുടെ സന്ദേശം നൽകുന്ന നിഗൂഢ നിർമ്മിതി” എന്ന വീഡിയോ ഡോക്യൂമെന്ററി പ്രദർശിപ്പിച്ചു. ശേഷം അദ്ദേഹത്തിന്റെ പ്രവർത്തനത്തെ ചാപ്റ്റർ പ്രസിഡന്റ് കാജൽ സക്കറിയ അനുമോദിക്കുകയും മൊമെന്റോ നൽകി ആദരിക്കുകയും ചെയ്‌തു. ചാപ്റ്ററിന്റെ പ്രവർത്തനോദ്ഘാടനം വൻവിജയമാക്കിയ എല്ലാ അംഗങ്ങളോടും സഹപ്രവർത്തകരോടുമുള്ള നന്ദി ജോയിന്റ് ട്രേഷറർ സാദിഖ് പുളികപറമ്പിൽ പങ്കുവെച്ചു. ചാപ്റ്ററിന്റെ മുന്നോട്ടുള്ള കുതിപ്പിനു എല്ലാവിധ ഭാവുകങ്ങളും അറിയിക്കുന്നതായും കമ്മിറ്റിയുടെ മുതിർന്ന അംഗവും നോർത്ത് അമേരിക്കയിലെ പ്രമുഖ മലയാള സാഹിത്യകാരിയും കവയിത്രിയുമായ അമ്മു സക്കറിയ പറഞ്ഞു.
പൊതുയോഗത്തിനു ശേഷം വിപുലമായ നൃത്യ നൃത്യങ്ങൾ അരങ്ങേറി. ടീം റിഥം, ടീം മുദ്ര, സയൻ ഗാനം, കൂടാതെ ടീം ഗ്രോവ്, ടീം പ്രവാഹ എന്നീ ഡാൻസ് ഗ്രൂപ്പുകളുടെ പരിപാടികൾ അരങ്ങേറി. പ്രശസ്ത കലാകാരനും ഡബ്ബിങ് ആർട്ടിസ്റ്റുമായ സാബു തിരുവല്ലയുടെ കോമഡി പരിപാടികളും സംഗീത രാവും കാണികളെ സന്തോഷിപ്പിച്ചു.
