ന്യൂഡൽഹി: അരവിന്ദ് കെജ്രിവാളിൻ്റെ ആം ആദ്മി പാർട്ടി നേതാക്കൾക്ക് ജല ബോർഡ് അഴിമതിയിൽ നിന്ന് പണം ലഭിച്ചതായി എൻഫോഴ്സ്മെന്റ് ഡയറക്ടറേറ്റ്. നേതാക്കളുമായി ബന്ധപ്പെട്ട 12 സ്ഥലങ്ങളിൽ റെയ്ഡ് നടത്തിയതിന് ശേഷമാണ് കേന്ദ്ര ഏജൻസിയുടെ വെളിപ്പെടുത്തൽ. ഈ പണം എഎപി തിരഞ്ഞെടുപ്പ് ഫണ്ടായി ഉപയോഗിച്ചെന്ന് ഇ.ഡി പറഞ്ഞു. എഎപിക്കോ പാർട്ടി നേതാക്കൾക്കോ ഈ കേസുമായി എന്തെങ്കിലും ബന്ധമുണ്ടെന്ന ഏജൻസിയുടെ ആരോപണത്തെ അപലപിക്കുന്നതായി എഎപി പ്രസ്താവന പുറത്തിറക്കി.
ആം ആദ്മി പാർട്ടി കൈക്കൂലി വാങ്ങിയ പണം തിരഞ്ഞെടുപ്പിന് ഉപയോഗിച്ചെന്ന് കേന്ദ്ര ഏജൻസികൾ ആരോപിക്കുന്ന രണ്ടാമത്തെ കേസാണിത്. ഡൽഹി മദ്യ നയ അഴിമതിപ്പണമാണ് ഗോവ നിയമസഭാ തെരഞ്ഞെടുപ്പിൽ പാർട്ടി പ്രചാരണത്തിന് ഉപയോഗിച്ചതെന്ന് ഏജൻസി നേരത്തേ ആരോപിച്ചിരുന്നു.
ഡൽഹി, വാരണാസി, ചണ്ഡീഗഢ് എന്നിവിടങ്ങളിൽ ഇന്നലെ നടത്തിയ പരിശോധനയിൽ നിരവധി രേഖകളും ഡിജിറ്റൽ തെളിവുകളും പിടിച്ചെടുത്തതായി ഏജൻസി അറിയിച്ചു. 1.97 കോടി രൂപയുടെ സാധനങ്ങളും 4 ലക്ഷം രൂപയുടെ വിദേശ കറൻസിയും പിടിച്ചെടുത്തതായി ഏജൻസി അറിയിച്ചു.
സാങ്കേതിക യോഗ്യതാ മാനദണ്ഡങ്ങൾ കമ്പനി പാലിക്കുന്നില്ലെന്ന് അറിഞ്ഞിട്ടും ഡൽഹി ജല ബോർഡ് ചീഫ് എൻജിനീയർ ജഗദീഷ് അറോറ എംഎസ് എൻകെജി ഇൻഫ്രാസ്ട്രക്ചറിന് 38 കോടി രൂപയുടെ കരാർ നൽകിയതായി അധികൃതർ പറഞ്ഞു. എഎപി നേതാക്കൾക്കും അദ്ദേഹം പണം അയച്ചിരുന്നുവെന്ന് ഉദ്യോഗസ്ഥർ പറഞ്ഞു.
ഈ കേസിൽ ജനുവരി 31 ന് അറോറയെയും അനിൽ കുമാർ അഗർവാൾ എന്ന കരാറുകാരനെയും ഇ.ഡി അറസ്റ്റ് ചെയ്തു. ഫെബ്രുവരി 10 വരെ ഇവരെ കസ്റ്റഡിയിൽ വിട്ടു.
