ചെന്നൈ: തമിഴക വെട്രി കഴകത്തിന്റെ ആദ്യ പൊതുസമ്മേളനം പ്രഖ്യാപിച്ച് വിജയ്. ഒക്ടോബര് 27ന് വിഴുപ്പുറത്ത് സമ്മേളനം നടക്കുമെന്നാണ് വിജയ് പ്രഖ്യാപിച്ചത്. സമ്മേളനത്തില് പാര്ട്ടിനയം പ്രഖ്യാപിക്കുമെന്ന് വിജയ് വ്യക്തമാക്കി. വൈകിട്ട് നാല് മണിക്കാണ് സമ്മേളനം.
തമിഴക വെട്രി കഴകത്തിന്റെ ആദ്യ പൊതുസമ്മേളനത്തില് ലോക്സഭ പ്രതിപക്ഷ നേതാവ് രാഹുല് ഗാന്ധിയെയും മുഖ്യമന്ത്രി പിണറായി വിജയനെയും പങ്കെടുപ്പിക്കാന് വിജയ് നീക്കം നടത്തുന്നുണ്ടെന്ന് നേരത്തെ റിപ്പോര്ട്ടുകള് ഉണ്ടായിരുന്നു. ഇവർക്കൊപ്പം ആന്ധ്ര മുഖ്യമന്ത്രി ചന്ദ്രബാബു നായിഡു, തെലങ്കാന മുഖ്യമന്ത്രി രേവന്ത് റെഡ്ഡി, കര്ണാടക ഉപമുഖ്യമന്ത്രി ഡി കെ ശിവകുമാര് എന്നിവരേയും വിജയ് ക്ഷണിച്ചേക്കുമെന്നും സൂചനയുണ്ട്. എന്നാൽ ഇക്കാര്യത്തിൽ സ്ഥിരീകരണം ആയിട്ടില്ല.
രാഷ്ട്രീയത്തില് വിജയ്ക്ക് ഏറ്റവും താത്പര്യമുള്ള നേതാവ് രാഹുലാണെന്നും അതിനാലാണ് അദ്ദേഹത്തെ ടി.വി.കെ.യുടെ സമ്മേളനത്തില് പങ്കെടുപ്പിക്കാന് ഒരുങ്ങുന്നതെന്നുമാണ് ടി.വി.കെ. നേതാക്കള് പറയുന്നത്. രാഹുല് ഗാന്ധിയുടെ ഉപദേശപ്രകാരമാണ് വിജയ് രാഷ്ട്രീയപ്പാര്ട്ടി രൂപവത്കരിക്കുന്നതെന്ന അഭ്യുഹങ്ങളും നേരത്തെ തന്നെ ഉയര്ന്നിട്ടുണ്ട്.
