ഈ രാജ്യത്ത് എല്ലാവര്‍ക്കും എല്ലാവര്‍ക്കും അഭിപ്രായസ്വാന്തന്ത്ര്യം ഉണ്ടെന്നും അത് ചിത്ര ചേച്ചിക്കും കൂടി ഉണ്ടെന്നും ഓര്‍ക്കുന്നത് നല്ലതാണെന്ന് നടിയും നര്‍ത്തകിയുമായ കൃഷ്ണ പ്രഭ. തന്റെ വിശ്വാസത്തെ കുറിച്ച് പറഞ്ഞത് കൊടിയ തെറ്റെന്ന തരത്തില്‍ ചിത്രയെ ആക്രമിക്കുന്നതിനോടോ യോജിക്കാന്‍ കഴിയില്ലെന്നും കൃഷ്ണ പ്രഭ പ്രതികരിച്ചു. കെ എസ് ചിത്രയ്‌ക്കെതിരായ വിമര്‍ശനത്തില്‍ സോഷ്യല്‍ മീഡിയയില്‍ പോസ്റ്റിലൂടെയാണ് കൃഷ്ണപ്രഭ പ്രതികരിച്ചത്.
കൃഷ്ണപ്രഭയുടെ കുറിപ്പിന്റെ പൂര്‍ണ്ണരൂപം:
ചിത്ര ചേച്ചി ചെയ്ത തെറ്റ് എന്താണ്? എനിക്ക് എത്ര ആലോച്ചിട്ടും മനസിലാകുന്നില്ല. ചിത്ര ചേച്ചി ഒരു ഈശ്വര വിശ്വാസി ആണെന്ന് എല്ലാവര്‍ക്കും അറിയുന്ന കാര്യമാണ്. എല്ലാ മതങ്ങളെയും ബഹുമാനിക്കുന്ന ഒരു ഗായിക കൂടിയാണ്. അവര്‍ വിശ്വസിക്കുന്ന മതത്തില്‍ വിശ്വസിക്കാനും അഭിപ്രായം പറയാനും അവകാശം ഇല്ലേ ഈ രാജ്യത്ത്.
രാജ്യത്തെ പ്രധാനപ്പെട്ട ക്ഷേത്രവുമായി ബന്ധപ്പെട്ട് ഒരു വീഡിയോ ചെയ്തതിന്റെ പേരില്‍ ചിത്ര ചേച്ചിയെ മോശമായ രീതിയില്‍ വിമര്‍ശിക്കുന്നത് ഒരിക്കലും അംഗീകരിക്കാന്‍ പറ്റില്ല. വിമര്‍ശിക്കാം.. അതിന് നിങ്ങള്‍ക്ക് അവകാശമുണ്ട്! അഭിപ്രായസ്വാന്തന്ത്ര്യം എല്ലാവര്‍ക്കും ഈ രാജ്യത്തുണ്ട്. അത് ചിത്ര ചേച്ചിക്കും ഉണ്ടെന്ന് കൂടി ഓര്‍ക്കുന്നത് നല്ലതാണ്.
എന്തോ കൊടിയ തെറ്റ് ചെയ്തത് പോലെ ചേച്ചിയെ ആക്രമിക്കുന്നു. എന്തെങ്കിലും ഒന്ന് കിട്ടിയാല്‍ പിന്നെ എന്റെ പൊന്നോ, തീര്‍ത്തും മോശമായ പദപ്രയോഗങ്ങള്‍ ഉപയോഗിച്ച് ചിത്ര ചേച്ചിക്ക് എതിരായുള്ള ചില പോസ്റ്റുകള്‍ ഈ വിഷയമായി ബന്ധപ്പെട്ട് കണ്ടതുകൊണ്ടാണ് ഞാന്‍ പ്രതികരിച്ചത്. ഈ വിഷയത്തില്‍ ഞാന്‍ ചിത്ര ചേച്ചിക്ക് ഒപ്പമാണ്.. അന്നും ഇന്നും എന്നും ഇഷ്ടം.
