തിരുവനന്തപുരം: തൃശൂര് പൂരത്തിനിടെയുണ്ടായ പ്രശ്നങ്ങള് ബിജെപിക്ക് രാഷ്ട്രീയ നേട്ടമുണ്ടാക്കാനെന്ന ചര്ച്ചകള് ചൂടുപിടിച്ചിരിക്കെ ആര്എസ്എസ് നേതാവിനെ കണ്ടെന്ന് സമ്മതിച്ച് എഡിജിപി എംആര് അജിത്കുമാര്.
ആര്എസ്എസ് ജനറല് സെക്രട്ടറി ദത്താത്രയെ ഹൊസാബലയെ തൃശ്ശൂരില്വച്ച് എഡിജിപി കണ്ടെന്ന് കഴിഞ്ഞ ദിവസം പ്രതിപക്ഷ നേതാവ് വി.ഡി.സതീശന് ആരോപിച്ചിരുന്നു. തൃശൂരിലെ ബി.ജെ.പി സ്ഥാനാര്ത്ഥി സുരേഷ് ഗോപിയെ ജയിപ്പിക്കാനായി അജിത് കുമാര് പൂരം കലക്കിയെന്ന് ഇടത് എംഎല്എ പി വി അന്വറും ആരോപണം ഉന്നയിച്ചിരുന്നു. ഇതിനു പിന്നാലെയാണ് എഡിജിപി എംആര് അജിത്കുമാറിന്റെ വെളിപ്പെടുത്തല്. മുഖ്യമന്ത്രിയുടെ ഓഫീസിന് നല്കിയ വിശദീകരണത്തിലാണ് അദ്ദേഹം ഇക്കാര്യം സമ്മതിച്ചിരിക്കുന്നത്.
സഹപാഠിയുടെ ക്ഷണപ്രകാരമാണ് പോയതെന്നും സ്വകര്യ സന്ദര്ശനം ആയിരുന്നുവെന്നുമാണ് വിശദീകരണത്തില് പറയുന്നത്. ക്രമസമാധന ചുമതല വഹിക്കുന്ന എഡിജിപി ആര്എസ്എസ് നേതാവുമായി കൂടിക്കാഴ്ച നടത്തിയത് വലിയ വിമര്ശനങ്ങളിലേക്കാണ് നീങ്ങുന്നത്. സംസ്ഥാന പൊലീസ് മേധാവി ഷെയ്ഖ് ദര്വേഷ് സാഹിബിന്റെ നേതൃത്വത്തിലുള്ള പ്രത്യേക സംഘം കൂടിക്കാഴ്ച്ചയെപ്പറ്റി അന്വേഷിക്കും.
