വിമാനം ആകാശച്ചുഴിയില്പ്പെട്ട് എയർ യൂറോപ്പ എയർലൈൻസിലെ 30 യാത്രക്കാർക്ക് പരുക്ക്. സ്പെയിൻ തലസ്ഥാനമായ മാഡ്രിഡിൽ നിന്നും യുറുഗ്വേയിലെ മൊൺടെവിഡിയോയിലേക്ക് പുറപ്പെട്ട ബോയിങ് യുഎക്സ് 045 വിമാനമാണ് തിങ്കളാഴ്ച ആകാശച്ചുഴിയിൽ പെട്ടത്. 325 യാത്രക്കാരായിരുന്നു വിമാനത്തിൽ ഉണ്ടായിരുന്നത്. സീറ്റ് ബെൽറ്റ് ധരിക്കാത്തവർക്കാണ് പരുക്കേറ്റത് .
One of the passengers on board the Air Europa flight that hit turbulence over the Atlantic had to be rescued from the overhead luggage compartment. https://t.co/UKtfioCRU4 pic.twitter.com/vU2BX6HX5z
— Breaking Aviation News & Videos (@aviationbrk) July 1, 2024
ഒരു യാത്രക്കാരൻ തെറിച്ച് ലഗേജ് ബോക്സിൽ എത്തിയ ദൃശ്യങ്ങൾ സമൂഹ മാധ്യമങ്ങളിൽ പ്രചരിക്കുന്നുണ്ട്. വിമാനം ആകാശച്ചുഴിയിൽ പെട്ടപ്പോൾ ഇരിപ്പിടത്തിൽ ഉണ്ടായിരുന്ന യാത്രക്കാരൻ പറന്ന് ലഗ്ഗേജ് ബോക്സിൽ എത്തിയതും ഇയാളെ മറ്റു യാത്രക്കാർ ചേർന്ന് താഴെ ഇറക്കുന്നതും ദൃശ്യങ്ങളിൽ കാണാം.
പരുക്കേറ്റ യാത്രക്കാരും വിമാനത്തിനുള്ളിൽ സംഭവിച്ച കേടുപാടുകൾ ദൃശ്യങ്ങളിൽ കാണാം. അപകടത്തിന്റെ ഭീകരത വ്യക്തമാക്കുന്ന വിഡിയോകളും പുറത്തുവന്നിട്ടുണ്ട്.
വിമാനത്തിനകത്തുനിന്നുള്ള ദൃശ്യങ്ങളാണ് ഇവയെന്ന് ദേശീയ മാധ്യമങ്ങൾ റിപ്പോർട്ട് ചെയ്യുന്നു. അപകടത്തിൽപെട്ട വിമാനം ബ്രസീലിലെ നതാൽ വിമാനത്താവളത്തിൽ പുലർച്ചെ 2.32-ഓടെ അടിയന്തരമായി ഇറക്കിയതായി റോയിട്ടേഴ്സ് റിപ്പോർട്ട് ചെയ്യുന്നു.
ആകാശച്ചുഴിയിൽ പെട്ടതിനെത്തുടർന്ന് വിമാനം അടിയന്തരമായി ലാൻഡ് ചെയ്തെന്നും പരിക്കേറ്റവർക്ക് മതിയായ ചികിത്സ ലഭ്യമാക്കിയിട്ടുണ്ടെന്നും എയർ യൂറോപ്പ അറിയിച്ചു.
Air Europa Flight hits Air turbulence 30 injured
