ബാലി: ബിസിസിഐ സെക്രട്ടറി ജയ് ഷാ വീണ്ടും ഏഷ്യന്‍ ക്രിക്കറ്റ് കൗണ്‍സില്‍ പ്രസിഡന്റ്. തുടര്‍ച്ചയായി മൂന്നാം തവണയാണ് ഷാ ഏഷ്യന്‍ ക്രിക്കറ്റ് അധ്യക്ഷനായി തെരഞ്ഞെടുക്കപ്പെടുന്നത്.
ബാലിയില്‍ ചേര്‍ന്ന ഏഷ്യന്‍ കൗണ്‍സില്‍ യോഗമാണ് ഷായെ വീണ്ടും തെരഞ്ഞെടുത്തത്. ശ്രീലങ്ക ക്രിക്കറ്റ് പ്രസിഡന്റ് ഷമ്മി സില്‍വയാണ് ഷായുടെ കാലാവധി നീട്ടണമെന്നു വ്യക്തമാക്കിയത്. ഇതിനെ എ.സി.സി. അംഗങ്ങള്‍ ഐകകണ്‌ഠ്യേന പിന്തുണക്കുകയായിരുന്നു.
ബംഗ്ലാദേശ് ക്രിക്കറ്റ് ബോര്‍ഡ് പ്രസിഡന്റ് നസ്മുല്‍ ഹസന്‍ സ്ഥാനമൊഴിഞ്ഞപ്പോള്‍ 2021ലാണ് ഷാ ഏഷ്യന്‍ ക്രിക്കറ്റിന്റെ തലപ്പത്തെത്തിയത്. 2022ല്‍ ടി20 ഫോര്‍മാറ്റിലും 23ല്‍ ഏകദിന ഫോര്‍മാറ്റിലും ഏഷ്യ കപ്പ് പോരാട്ടം നടത്തിയതു ഷായുടെ നേതൃത്വത്തിലാണ്. തന്നിലര്‍പ്പിച്ച വിശ്വാസത്തിനു ഷാ അംഗങ്ങളോടു നന്ദി പറഞ്ഞു. ഷായുടെ നേതൃത്വത്തില്‍ ഇന്ത്യ, ബംഗ്ലാദേശ്, പാകിസ്ഥാന്‍, ശ്രീലങ്ക ടീമുകളിലേക്ക് പുതിയ താരങ്ങളെ കണ്ടെത്താന്‍ ഏഷ്യന്‍ കൗണ്‍സിലിനു സാധിച്ചതായി അംഗങ്ങള്‍ അഭിപ്രായപ്പെട്ടു.
