ജറുസലം: ഒഴിഞ്ഞുപോകാനുള്ള മുന്നറിയിപ്പു നൽകി നിമിഷങ്ങൾക്കകം തെക്കൻ ഗാസയിലെ ഖാൻ യൂനിസിൽ, ഇസ്രയേൽ സൈന്യം നടത്തിയ കനത്ത ആക്രമണങ്ങളിൽ കുട്ടികളും സ്ത്രീകളുമടക്കം 70പേർ കൊല്ലപ്പെട്ടു. 200ലധികം പേർക്കു പരുക്കേറ്റു. സുരക്ഷിതമേഖലയെന്നു പറഞ്ഞിരുന്ന ബാനി സുഹൈല പട്ടണത്തിലടക്കം ഇസ്രയേൽ ടാങ്കുകൾ കനത്ത ഷെല്ലാക്രമണവും ബോംബിങ്ങുമാണു നടത്തിയത്.
ചൊവ്വാഴ്ച പുലർച്ചെ ഖാൻ യൂനിസിലെ കിഴക്കൻ പ്രദേശങ്ങളിൽ താമസിക്കുന്ന പലസ്തീനികളെ ഉടൻ തന്നെ ഒഴിപ്പിക്കാൻ ഇസ്രായേൽ സൈന്യം ഉത്തരവിട്ടിരുന്നു, ഇസ്രായേൽ ബോംബാക്രമണത്തിനിടയിൽ താമസക്കാർ കാൽനടയായും വണ്ടികളിലും പലായനം ചെയ്യുന്നത് കണ്ടതായി ഔദ്യോഗിക പലസ്തീൻ വാർത്താ ഏജൻസി വഫ റിപ്പോർട്ട് ചെയ്തു.
നഗരത്തിലെ നാസർ മെഡിക്കൽ കോംപ്ലക്സ് രക്ത യൂണിറ്റുകളുടെ കടുത്ത ക്ഷാമത്തിനിടയിൽ പരിക്കേറ്റവർക്കായി അടിയന്തിരമായി രക്തം ദാനം ചെയ്യാൻ താമസക്കാരോട് ആഹ്വാനം ചെയ്തു. ഖാൻ യൂനിസിന് തൊട്ടടുത്ത ദെയറൽ ബലാഹ് പട്ടണത്തിൽ ബോംബാക്രമണങ്ങളിൽ ഒരു മാധ്യമ പ്രവർത്തകൻ കൊല്ലപ്പെട്ടു. ഇതോടെ ഗാസയിൽ കൊല്ലപ്പെട്ട മാധ്യമപ്രവർത്തകരുടെ എണ്ണം 153 ആയി.
ഖാൻ യൂനിസിൻ്റെ കിഴക്കൻ പ്രദേശങ്ങൾ സുരക്ഷിതമേഖലയെന്നു ഇസ്രയേൽ സൈന്യം നേരത്തേ പറഞ്ഞിരുന്നു. ഇവിടെ 4 ലക്ഷത്തോളം പലസ്തീൻകാരുണ്ട്. ഈ പ്രദേശത്ത് കഴിഞ്ഞ ദിവസം ഇസ്രയേൽ സൈന്യത്തിനുനേരെ റോക്കറ്റാക്രമണമുണ്ടായിരുന്നു. ഇസ്രയേൽ ആക്രമണങ്ങളിൽ ഇതുവരെ ഗാസയിൽ കൊല്ലപ്പെട്ടവരുടെ എണ്ണം 39,006 ആയി.
രണ്ടാഴ്ച മുമ്പ്, ഖാൻ യൂനിസിന് സമീപമുള്ള അൽ-മവാസി പ്രദേശത്ത് ഇസ്രായേൽ സൈന്യം 90 പലസ്തീനികളെ കൊല്ലുകയും 300 പേർക്ക് പരുക്കേൽക്കുകയും ചെയ്തിരുന്നു.
