കൊച്ചി: ആലുവ സ്വദേശിയായ നടിക്കും അഭിഭാഷകനുമെതിരെ പരാതി നല്കി ബാലചന്ദ്രമേനോന്. മൂന്ന് ലൈംഗിക ആരോപണങ്ങള് ഉടന് വരുമെന്ന് ഭീഷണിപ്പെടുത്തി, ബ്ലാക്ക് മെയിലിംഗ് നടത്തി എന്നാണ് ബാലചന്ദ്രമേനോന് പരാതിയില് പറയുന്നു. ഫോണിലൂടെ ഭീഷണിപ്പെടുത്തിയത് നടിയുടെ അഭിഭാഷകനാണെന്നും പരാതിയിലുണ്ട്. സംസ്ഥാന പൊലീസ് മേധാവിക്കും മുഖ്യമന്ത്രിക്കും ആണ് പരാതി നല്കിയത്.
കഴിഞ്ഞ സെപ്തംബര് 13 ാം തിയതി തനിക്ക് ഒരു ഫോണ് കോള് വന്നിരുന്നു. അഡ്വ. സന്ദീപ് എന്നാണ് പരിചയപ്പെടുത്തിയത്. മൂന്ന് ലൈംഗിക പീഡനക്കേസുകള് തനിക്കെതിരെ വരുന്നു എന്നായിരുന്നു ഫോണ്കോളില് പറഞ്ഞിരുന്നത്. ആ ഫോണ് കോള് കട്ട് ചെയ്തു.
അടുത്ത ദിവസം മണിയന്പിള്ള രാജുവിനെതിരെയും പരാതി നല്കിയ ഈ നടി സമൂഹ മാധ്യമങ്ങളിലടക്കം കമിങ് സൂണ് എന്ന് പറഞ്ഞു കൊണ്ട് പോസ്റ്റിട്ടു. ചില ഓണ്ലൈന് മാധ്യമങ്ങള് അതേറ്റ് പിടിച്ച് തനിക്കെതിരെ ദുഷ്പ്രചരണം നടത്തിയെന്നും ബാലചന്ദ്രമേനോന്റെ പരാതിയിലുണ്ട്. ഇതൊരു ഗൂഢാലോചനയുടെ ഭാഗമാണെന്നും ബാലചന്ദ്രമേനോന് പരാതിയില് പറയുന്നു. ദേ, ഇങ്ങോട്ട് നോക്കിയേ എന്ന സിനിമയുടെ സെറ്റില് വെച്ചാണ് നടിയെ പീഡിപ്പിച്ചുവെന്ന് ആരോപണം ഉന്നയിച്ചിരിക്കുന്നത്. നടന് ജയസൂര്യക്കെതിരെയുള്ള ലൈംഗികാരോപണവും ഇതേ സിനിമയുടെ സെറ്റിലായിരുന്നു.
