ലോക്സഭാ തിരഞ്ഞെടുപ്പിനുള്ള ബിജെപിയുടെ ആദ്യഘട്ട സ്ഥാനാർഥി പട്ടിക ഇന്ന് പ്രഖ്യാപിച്ചേക്കും. സ്ഥാനാർത്ഥി പട്ടികയ്ക്ക് അംഗീകാരം നൽകാനുള്ള ബിജെപി കേന്ദ്ര തെരഞ്ഞെടുപ്പ് സമിതി – പാർലമെന്ററി ബോർഡ് യോഗങ്ങൾ ഇന്നലെ രാത്രി ചേർന്നു. 100 സ്ഥാനാർത്ഥികളുടെ പേരുകളാണ് ആദ്യപട്ടികയിൽ ഉള്ളത് എന്നാണ് സൂചന. ഇന്നലെ രാത്രി 11 മണിക്ക് നരേന്ദ്ര മോദിയുടെ വസതിയിൽ ചേർന്ന മീറ്റിങ് പുലർച്ചെ 3,30 വരെ നീണ്ടു. ആദ്യ ലിസ്റ്റിൽ നരേന്ദ്ര മോദി , അമിത്ഷാ തുടങ്ങിയ പ്രമുഖരുടെ പേരുകളാണ് ഉണ്ടായിരിക്കുക എന്നാണ് സൂചന. കേരളത്തിലെ പ്രധാന മണ്ഡലങ്ങളിലെ പട്ടികയും ഇന്നു വന്നേക്കുമെന്നാണ് സൂചന. എന്നാൽ ആന്ധ്രപ്രദേശ്, പഞ്ചാബ്, തമിഴ് നാട് സംസ്ഥാനങ്ങളിലെ കാര്യങ്ങളിൽ തീരുമാനമായിട്ടില്ല.
പ്രധാനമന്ത്രി നരേന്ദ്രമോദി, കേന്ദ്ര ആഭ്യന്തരമന്ത്രി അമിത് ഷാ, പ്രതിരോധമന്ത്രി രാജനാഥ് സിംഗ്, മധ്യപ്രദേശ് മുൻമുഖ്യമന്ത്രി ശിവരാജ് സിംഗ് ചൗഹാൻ തുടങ്ങിയവരുടെ പേരുകൾ ആദ്യപട്ടികയിൽ ഉണ്ടാകും. ഒപ്പം സിനിമ ക്രിക്കറ്റ് മേഖലയിൽ നിന്നുള്ള ചില പേരുകളും ആദ്യപട്ടികയിൽ ഇടം പിടിക്കും എന്നാണ് ബിജെപി കേന്ദ്രങ്ങളിൽ നിന്നും ലഭിക്കുന്ന വിവരം. സിനിമാ മേഖലയിൽ നിന്നും അക്ഷയ് കുമാർ, കങ്കണ റണൗട്ട്, എന്നിവരും ക്രിക്കറ്റ് താരം യുവരാജ് സിങ്ങും സ്ഥാനാർത്ഥിപ്പട്ടികയിൽ ഉണ്ടെന്ന് ഇന്നലെ മുതൽ ദേശീയ മാധ്യമങ്ങൾ റിപ്പോർട്ട് ചെയ്യുന്നുണ്ട്.
ഡൽഹിയിൽ ഡോക്ടർ ഹർഷവർധൻ, മീനാക്ഷി ലേഖി എന്നി മുതിർന്ന നേതാക്കളെ തഴഞ്ഞ് സുഷമാ സ്വരാജിന്റെ മകൾ ബാൻസുരി സ്വരാജ് അടക്കമുള്ള പുതുമുഖങ്ങളെ ഇത്തവണ രംഗത്ത് ഇറക്കുമെന്നും റിപ്പോർട്ടുകളുണ്ട്. സിറ്റിങ് മണ്ഡലങ്ങളായ വാരണാസിയിൽ നിന്ന് മോദിയും ഗാന്ധിനഗറിൽ നിന്ന് അമിത് ഷായും ലക്നൌവി നിന്ന് രാഡ്നാഥ് സിങ്ങും മൽസരിച്ചേക്കും.
BJP Candidate first list likely today
