ലണ്ടൻ: സുഹൃത്തുക്കളോടൊപ്പം യാത്ര ചെയ്യുന്നതിനിടെ താൻ സഞ്ചരിക്കുന്ന വിമാനം പൊട്ടിത്തെറിക്കുമെന്ന് തമാശ പറഞ്ഞതിന് അറസ്റ്റിലായ ബ്രിട്ടീഷ്-ഇന്ത്യൻ വിദ്യാർത്ഥിയെ സ്പാനിഷ് കോടതി കുറ്റവിമുക്തനാക്കി.
ബാത്ത് യൂണിവേഴ്‌സിറ്റിയിലെ ഇക്കണോമിക്‌സ് വിദ്യാർത്ഥിയായ ആദിത്യ വർമ്മ, 2022 ജൂലൈയിൽ സുഹൃത്തുക്കളോടൊപ്പം മെനോർക്ക ദ്വീപിലേക്ക് പോകുമ്പോൾ സ്‌നാപ്ചാറ്റിൽ താൻ താലിബാൻ അംഗമാണെന്ന് പരാമർശം നടത്തിയതാണ് വിനയായത്.
”പറക്കുന്നതിനിടെ, ഈ വിമാനം പൊട്ടിത്തെറിക്കും. ഞാൻ താലിബാൻ അംഗമാണ്”, എന്നായിരുന്നു ഗാറ്റ്‍വിക് വിമാനത്താവളം വിടുന്നതിന് മുമ്പ് വിദ്യാർഥിയുടെ സന്ദേശം. പരിശോധനയിൽ ആദിത്യയുടെ കൈയിൽ നിന്ന് സ്ഫോടകവസ്തുക്കളൊന്നും കണ്ടെടുത്തിട്ടില്ലെന്നും അതിനാൽ ഭീഷണി സത്യമാണെന്ന് വിശ്വസിക്കാൻ കഴിയില്ലെന്നും സ്പാനിഷ് കോടതി വിലയിരുത്തി.
സംഭവം നടക്കുമ്പോൾ 18 വയസായിരുന്നു ആദിത്യയുടെ പ്രായം. അറസ്റ്റ് ചെയ്ത് രണ്ടുദിവസത്തിനു ശേഷം ജാമ്യത്തിൽ വിടുകയായിരുന്നു പൊലീസ്. സുഹൃത്തുക്കൾ മാത്രമുള്ള ഒരു ഗ്രൂപ്പിൽ വിമാനത്തിൽ സ്ഫോടനമുണ്ടാകുമെന്ന് തമാശ പറഞ്ഞതാണെന്നും ആരെയും ഉപദ്രവിക്കാൻ ലക്ഷ്യമിട്ടായിരുന്നില്ലെന്നും ആദിത്യ കോടതിയിൽ അറിയിച്ചു.
