ഇല്ലിനോയ്: വെള്ളിയാഴ്ച മൂന്ന് സംസ്ഥാനങ്ങളിൽ വിറ്റഴിച്ച മുട്ടകൾ തിരിച്ചുവിളിച്ചത് സംബന്ധിച്ച് യുഎസിൽ സെൻ്റർസ് ഫോർ ഡിസീസ് കൺട്രോൾ ആൻഡ് പ്രിവൻഷൻ (സിഡിസി) മുന്നറിയിപ്പ് നൽകി.
മുട്ടയിലൂടെ പകരുന്ന സാൽമൊണല്ല ബാധ കാരണം 24 പേരെ ആശുപത്രിയിൽ പ്രവേശിപ്പിച്ചതായും വിപണിയിൽ നിന്നും തിരിച്ചുവിളിച്ച മുട്ടകൾ ഉപയോഗിക്കുകയോ അവ വിൽക്കുകയോ ചെയ്യരുതെന്നും ഫുഡ് സേഫ്റ്റിൽ അലേർട്ടിൽ സിഡിസി അറിയിച്ചു. മിഷിഗൺ, വിസ്കോൺസിൻ, ഇല്ലിനോയിസ് എന്നിവിടങ്ങളിലെ സ്റ്റോറുകളും റെസ്റ്റോറൻ്റുകളുമാണ് ഈ മുട്ടകൾ വാങ്ങിയിരിക്കുന്നത് എന്നാണ് റിപ്പോർട്ട്.
ഫുഡ് ആൻഡ് ഡ്രഗ് അഡ്മിനിസ്‌ട്രേഷൻ (എഫ്‌ഡിഎ) വെബ്‌സൈറ്റിൽ വെള്ളിയാഴ്ച പുറത്തിറക്കിയ അറിയിപ്പിൽ മിലോയുടെ പൗൾട്രി ഫാംസ് ഇക്കാര്യം സ്ഥിരീകരിച്ചു, “എല്ലാ ‘മിലോസ് പൗൾട്രി ഫാമുകളും’ ‘ടോണിയുടെ ഫ്രഷ് മാർക്കറ്റ്’ ബ്രാൻഡഡ് മുട്ടകളും തിരിച്ചുവിളിക്കുന്നു, കാരണം ഈ മുട്ടകൾക്ക് സാൽമൊണല്ല ബാധിതമാകാൻ സാധ്യതയുണ്ട്. ചെറിയ കുട്ടികളിലും, ദുർബലരായ അല്ലെങ്കിൽ പ്രായമായവരിലും, ദുർബലമായ പ്രതിരോധ ശേഷിയുള്ളവരിലും ഗുരുതരവും ചിലപ്പോൾ മാരകവുമായ അണുബാധകൾ ഉണ്ടാക്കിയേക്കാവുന്ന ജീവിയാണ് സാൽമോണല്ല.”
സാൽമൊണല്ല ബാധിച്ച ആളുകൾക്ക് പലപ്പോഴും പനി, വയറിളക്കം, ഓക്കാനം, ഛർദ്ദി, വയറുവേദന എന്നിവ അനുഭവപ്പെടാറുണ്ട്. സാൽമൊണെല്ല ലക്ഷണങ്ങൾ ഉണ്ടെങ്കിൽ ആളുകൾ ഹെൽത്ത് കെയർ പ്രൊവൈഡറുമായി ബന്ധപ്പെടാൻ സിഡിസി ശുപാർശ ചെയ്തു
