തിരുവനന്തപുരം: മോദി പിണറായി വിജയനെ ചേര്ത്തുപിടിച്ചത് വിശ്വസ്തനെ പോലെയാണെന്നും എക്സാലോജിക്ക് അന്വേഷണവും ഫ്രീസറില് ആകുമെന്നും കോണ്ഗ്രസ് സംസ്ഥാന അദ്ധ്യക്ഷന് കെ സുധാകരന്. എക്സാലോജിക്കിന്റെ അനധികൃത ഇടപാടാണ് മോദിയെ പിണറായി വണങ്ങാന് കാരണം. ഇന്ത്യാ മുന്നണിയെ ദുര്ബലപ്പെടുത്താനുള്ള ചട്ടുകമായാണ് മോദി പിണറായിയെ കാണുന്നതെന്നും സുധാകരന് പറഞ്ഞു.
ബിജെപി- സിപിഎം ബന്ധത്തിന്റെ ആഴവും കോണ്ഗ്രസ് വിരോധത്തിന്റെ ഉച്ചാവസ്ഥയും വെളിപ്പെടുത്തുന്നതാണ് പ്രധാനമന്ത്രിയുടെ കേരള സന്ദര്ശനമെന്നും കെ സുധാകരന് പറഞ്ഞു. കോണ്ഗ്രസിനെ രൂക്ഷമായി വിമര്ശിച്ച പ്രധാനമന്ത്രി ഡസന് കണക്കിനു ബിജെപി പ്രവര്ത്തകരെ കൊന്നൊടുക്കിയ ചരിത്രമുള്ള സിപിഎമ്മിനോടും അതില് പങ്കാളിയായ പിണറായി വിജയനോടും കാട്ടിയ പ്രതിപത്തി അമ്പരപ്പിക്കുന്നതാണ്. പ്രധാനമന്ത്രിയെ കണ്ടപ്പോള് പിണറായിയുടെ മുഖത്ത് ഭയഭക്തി ബഹുമാനങ്ങള് ഓളം വെട്ടി. മോദി പിണറായിയെ ചേര്ത്തു പിടിച്ചത് ഏറ്റവും വിശ്വസ്തനെയെന്ന പോലെയാണ്.
എക്സാലോജിക് പണമിടപാടിനെക്കുറിച്ച് അന്വേഷിക്കാന് ഇഡിയെയും സിബിഐയെയും നിയോഗിക്കുന്നതിനു പകരം ആര്ഒസിയുടെ റിപ്പോര്ട്ട് കേന്ദ്രകോര്പറേറ്റ് കാര്യ മന്ത്രാലയത്തിനു വിട്ട് പിണറായിയെ സംരക്ഷിച്ചു. ആര്ഒസിയുടെ വെബ്സൈറ്റില്നിന്ന് എക്സാലോജിക്കിനെതിരായ റിപ്പോര്ട്ട് പോലും നീക്കം ചെയ്തു. സഹകരണബാങ്കുകളിലെ ഇഡി അന്വേഷണം, മുഖ്യമന്ത്രിയുടെ ഓഫീസ് കേന്ദ്രീകരിച്ചു നടന്ന സ്വര്ണക്കടത്ത്, ഡോളര് കടത്ത്, ലൈഫ് മിഷന് ഇടപാട്, ലാവ്ലിന് കേസ് തുടങ്ങിയവയുടെ വഴിയെ എക്സാലോജിക് ഇടപാടും ഫ്രീസറിലേക്കു നീങ്ങുന്നുവെന്നും വ്യക്തമാണെന്നും കെ സുധാകരന് പറഞ്ഞു.
