വാഷിംഗ്ടൺ: കാനഡയിൽ നിന്ന് യുഎസിലേക്ക് അനധികൃതമായി കടക്കാൻ ശ്രമിച്ച മൂന്ന് ഇന്ത്യക്കാരുൾപ്പെടെ നാല് പേർ അറസ്റ്റിൽ. ഓടിക്കൊണ്ടിരിക്കുന്ന ചരക്ക് ട്രെയിനിൽ നിന്ന് ചാടിയ നാല് പേരാണ് ന്യൂയോർക്കിലെ അപ്‌സ്റ്റേറ്റിൽ അറസ്റ്റിലായത്.
മാർച്ച് 12 ന് യുഎസ് ബോർഡർ പട്രോൾ ഏജൻ്റുമാർ ഒരു സ്ത്രീ ഉൾപ്പെടെ നാലുപേരെ അറസ്റ്റ് ചെയ്തു. പൗരന്മാരാണെന്ന് തെളിയിക്കാനുള്ള രേഖകളൊന്നും നാലുപേരുടെ പക്കലും ഇല്ലെന്നാണ് വിവരം.
ബഫല്ലോ നഗരത്തിലെ ഇൻ്റർനാഷണൽ റെയിൽറോഡ് പാലത്തിൽ ഓടുന്ന ചരക്ക് ട്രെയിനിൽ നിന്ന് നാല് പേർ ചാടുന്നത് ബഫല്ലോ സ്റ്റേഷനിലേക്ക് നിയോഗിക്കപ്പെട്ട ബോർഡർ പട്രോൾ ഏജൻ്റുമാരാണ് കണ്ടത്.
വീഴ്ചയിൽ പരുക്കേറ്റ് അനങ്ങാനാകാതെയായ സ്ത്രീയെ ഉപേക്ഷിച്ച് രക്ഷപ്പെടാൻ ശ്രമിച്ച മൂന്ന് പുരുഷന്മാരെയും പിടികൂടി. പരുക്കേറ്റ സ്ത്രീക്ക് പ്രഥമശുശ്രൂഷ നൽകി. ചികിത്സയ്ക്ക് ശേഷം യുവതിയെ ആംബുലൻസിൽ പ്രാദേശിക മെഡിക്കൽ സെൻ്ററിലേക്ക് കൊണ്ടുപോയി.
സ്ത്രീയും രണ്ട് പുരുഷന്മാരും ഇന്ത്യയിൽ നിന്നുള്ളവരാണെന്നും മൂന്നാമത്തെയാൾ ഡൊമിനിക്കൻ റിപ്പബ്ലിക്കിൽ നിന്നുള്ളവരാണെന്നും അതിർത്തി പട്രോളിംഗ് ഏജൻ്റുമാർ പറഞ്ഞു.
മൂന്നുപേരെ ബറ്റാവിയ ഫെഡറൽ ഡിറ്റൻഷൻ ഫെസിലിറ്റിയിൽ തടങ്കലിൽ പാർപ്പിച്ചിരിക്കുകയാണ്. തുടർ ചികിത്സയ്ക്കായി യുവതി പ്രാദേശിക മെഡിക്കൽ സെൻ്ററിൽ തുടരുകയാണ്.
