കുട്ടികളെ സംബന്ധിച്ച് ജന്മദിനത്തില്‍ കേക്ക് മുറിക്കുന്നത് അധിക സന്തോഷമാണ്. അവരുടെ പ്രിയപ്പെട്ട കാര്‍ട്ടൂണ്‍ കഥാപാത്രമോ താരങ്ങളോ കളിപ്പാട്ടമോ ഒക്കെയാണ് മിക്കപ്പോഴും കേക്കുകളുടെ തീം ആകുന്നതും. എന്നാല്‍, സൈബറിടത്തെ ചൊടിപ്പിച്ച ഒരു ബര്‍ത്ത്‌ഡേ കേക്കാണ് ഇപ്പോള്‍ ചര്‍ച്ചാ വിഷയം.
ഫലസ്തീന്‍ പതാകകളുടെ പശ്ചാത്തലത്തില്‍ ഒരു ഹമാസ് പ്രവര്‍ത്തകന്‍! അതാണ് നാലുവയസുകാരനായ ഓസ്ട്രേലിയന്‍ ബാലന്റെ ജന്മദിന കേക്ക്. ഇന്റര്‍നെറ്റില്‍ പലരെയും ചൊടിപ്പിച്ചതെന്താണെന്ന് ഇപ്പോള്‍ പിടികിട്ടിയോ.
സിഡ്നിയിലെ ഒരു ബേക്കറിയാണ് കേക്ക് രൂപകല്‍പന ചെയ്തത്. തുടര്‍ന്ന് അതിന്റെ ഫോട്ടോകള്‍ സോഷ്യല്‍ മീഡിയയില്‍ അവര്‍ പങ്കുവെക്കുകയും ചെയ്തു. എന്നാല്‍ പ്രതിഷേധം ശക്തമായതോടെ അവര്‍ക്ക് തങ്ങളുടെ സോഷ്യല്‍ മീഡിയ അക്കൗണ്ടുകള്‍ ഡിലീറ്റ് ചെയ്യേണ്ടി വന്നു. റിപ്പോര്‍ട്ട് പ്രകാരം ഓസ്ട്രേലിയന്‍ ഫെഡറല്‍ പോലീസ് നിലവില്‍ വിഷയം അന്വേഷിക്കുകയാണ്.
ചൊവ്വാഴ്ച, ഫലസ്തീന്‍ പതാകയും ഹമാസിന്റെ വക്താവ് അബു ഉബൈദയുടെ ചിത്രവും കൊണ്ട് അലങ്കരിച്ച ഒരു വലിയ കേക്കിന്റെ അരികില്‍ വിരല്‍ ഉയര്‍ത്തി നില്‍ക്കുന്ന കൊച്ചുകുട്ടിയുടെ ചിത്രങ്ങള്‍ സൈബറിടത്തില്‍ വൈറലായി മാറുകയായിരുന്നു. കേക്കിലെ ആളെപ്പോലെയുള്ള വസ്ത്രവും ശിരോവസ്ത്രവും ധരിച്ചാണ് കുട്ടി പോസ് ചെയ്തത്.
ചിലര്‍ കേക്ക് ഡിസൈന്‍ ചെയ്ത ബേക്കറിയെ അഭിനന്ദിച്ചപ്പോള്‍ മറ്റുചിലരാകട്ടെ, ബേക്കറിയെയും കേക്ക് ഡിസൈനിനെയും ആക്ഷേപിച്ചു. ഇത്തരമൊരു തീം ഉപയോഗിച്ച് ഒരു കേക്ക് ഡിസൈന്‍ ചെയ്യാനുള്ള തീരുമാനത്തിന് നിരവധി ആളുകള്‍ കുടുംബത്തെ അപകീര്‍ത്തിപ്പെടുത്തിയും രംഗത്തെത്തി.
