ന്യൂഡൽഹി: ഖാലിസ്ഥാൻ ഭീകരൻ ഗുർപത്വന്ത് സിംഗ് പന്നൂനെതിരെയുള്ള കൊലപാതക ഗൂഢാലോചന പരാജയപ്പെട്ട സംഭവവുമായി ബന്ധപ്പെട്ട അന്വേഷണത്തെക്കുറിച്ചുള്ള ചൈനയുടെ അഭിപ്രായത്തിൽ പ്രതികരണവുമായി ഇന്ത്യ. ഇന്ത്യയ്ക്കും അമേരിക്കയ്ക്കും ഇരു രാജ്യങ്ങളും തമ്മിലുള്ള ഏത് പ്രശ്‌നവും നേരിടാൻ കഴിയുമെന്ന് വിദേശകാര്യ മന്ത്രാലയം വ്യക്തമാക്കി.
ഇന്ത്യയ്ക്കും അമേരിക്കയ്ക്കും തങ്ങളുടെ പ്രശ്നങ്ങൾ നേരിടാൻ കഴിവുണ്ടെന്നും, അവിടെ ഇതുമായി യാതൊരു ബന്ധവുമില്ലാത്ത മൂന്നാമതൊരു കക്ഷിയുടെ ഇടപെടൽ ആവശ്യമില്ലെന്നും വിദേശകാര്യ മന്ത്രാലയം വക്താവ് രൺധീർ ജയ്‌സ്വാൾ പ്രതികരിച്ചു. ഊഹിച്ചുള്ള അഭിപ്രായങ്ങൾക്കും അനാവശ്യ ഉപദേശങ്ങൾക്കും ഇവിടെ പ്രസക്തിയില്ലെന്നും അദ്ദേഹം വ്യക്തമാക്കി.
ഇന്ത്യയും അമേരിക്കയും അന്താരാഷ്ട്ര നിയമങ്ങളും അന്താരാഷ്ട്ര ബന്ധങ്ങളെ നിയന്ത്രിക്കുന്ന അടിസ്ഥാന മാനദണ്ഡങ്ങളും പാലിക്കണമെന്ന് ചൈനീസ് വിദേശകാര്യ മന്ത്രാലയ വക്താവ് ലിൻ ജിയാൻ പത്രസമ്മേളനത്തിൽ പറഞ്ഞതിന് പിന്നാലെയാണിത്.
“ചൈന റിപ്പോർട്ടുകൾ ശ്രദ്ധിച്ചു. ഈ രാജ്യങ്ങൾ അന്താരാഷ്ട്ര നിയമങ്ങളും അന്താരാഷ്ട്ര ബന്ധങ്ങളെ നിയന്ത്രിക്കുന്ന അടിസ്ഥാന മാനദണ്ഡങ്ങളും ആത്മാർത്ഥമായി പാലിക്കുമെന്ന് ഞങ്ങൾ പ്രതീക്ഷിക്കുന്നു,” ജിയാൻ പറഞ്ഞു.
ഇന്ത്യ ഭീകരനായി പ്രഖ്യാപിച്ച ഗുർപത്വന്ത് സിംഗ് പന്നൂൻ, അമേരിക്കൻ, കനേഡിയൻ പൗരത്വമുള്ള വ്യക്തിയാണ്. ഗുർപത്വന്ത് സിംഗ് പന്നൂനിനെ കൊലപ്പെടുത്താൻ ഇന്ത്യക്കാരനായ നിഖിൽ ഗുപ്ത ശ്രമിച്ചുവെന്നായിരുന്നു കേസ്. കൊലപാതക ശ്രമം ഇന്ത്യയുടെ അറിവോടെയാണെന്നുമാണ് അമേരിക്കൻ മാധ്യമങ്ങൾ റിപ്പോർട്ട് ചെയ്തത്. അമേരിക്ക ഈ വിഷയത്തിൽ ഇന്ത്യയ്‌ക്ക് റിപ്പോർട്ട് കൈമാറിയിരുന്നു. റിപ്പോർട്ട് അന്വേഷിക്കുന്നതിനായി ഇന്ത്യ ഉന്നതതല സംഘത്തിനും രൂപം നൽകിയിരുന്നു.
