അമേരിക്കയിൽ പാക്കിസ്ഥാനി പൗരനെ മോഷ്ടാക്കൾ വെടിവച്ച് കൊലപ്പെടുത്തി. മോഷണ ശ്രമത്തിനിടെയായിരുന്നു സംഭവം. ഡ്രൈവറായ നവീദ് അഫ്സൽ തന്റെ കാറിനുള്ളിലാണ് കൊല്ലപ്പെട്ടത്. നവീദ് തന്റെ അമേരിക്കൻ സ്വപ്നം പിന്തുടരുന്ന ആളായിരുന്നുവെന്ന് അദ്ദേഹത്തിന്റെ കൂടെ താമസിച്ചിരുന്ന സുഹൃത്തുക്കൾ പറഞ്ഞു.
52 കാരനായ നവീദ് അഫ്സൽ രണ്ട് വർഷം മുമ്പാണ് അമേരിക്കയിൽ വന്നത്. വിശ്രമമില്ലാതെ ജോലി ചെയ്തിരുന്ന നവീദ് പകൽ സമയം റെഡ് ഹുക്കിലെ ഒരു റെസ്റ്റോറൻ്റിൽ പകൽ ചിക്കൻ ഫ്രൈ ചെയ്തും രാത്രിയിൽ കാർ സർവീസ് ഡ്രൈവറായും ജീവിതമാർഗം കണ്ടെത്തി. കിട്ടുന്നതെല്ലാം ഭാര്യയ്ക്കും നാല് മക്കൾക്കുമായി അയച്ചു കൊടുത്തു.
കഴിഞ്ഞമാസം അവസാനമാണ് അഫ്‌സലിൻ്റെ സ്വപ്നം പാതിയിൽ മുറിഞ്ഞു പോയത്. ജൂൺ 20 ന് ബ്രൂക്ലിനിൽ രാത്രി വൈകി അദ്ദേഹത്തെ മരിച്ച നിലയിൽ കണ്ടെത്തി. തലയ്ക്ക് വെടിയേറ്റാണ് അദ്ദേഹം കൊല്ലപ്പെട്ടത്. മോഷണശ്രമത്തിനിടെ മോഷ്ടാക്കളാണ് നവീദ് അഫ്സലിനെ കൊലപ്പെടുത്തിയതെന്ന് പൊലീസ് പറയുന്നു. മൃതദേഹം നാട്ടിലെത്തിച്ചു.
ഭാര്യയും നാലുമക്കളുമടങ്ങുന്ന നവീദിന്റെ കുടുംബം എങ്ങനെ മുന്നോട്ടു പോകുമെന്ന ആശങ്കയിലാണ് അദ്ദേഹത്തിന്റെ സുഹൃത്തുക്കൾ.
“നവീദ് ഇല്ലാതെ അവർ കഷ്ടപ്പെടും. അവൻ എല്ലാ ആഴ്ചയും വീട്ടിലേക്ക് പണം അയച്ചിരുന്നു,” ബറോ പാർക്കിലെ അഫ്‌സലിൻ്റെ രണ്ട് റൂംമേറ്റുകളിൽ ഒരാളായ മുഹമ്മദ് റണ്ട്ജ്വ പറഞ്ഞു.
രാത്രി 10 മണിയോടെയാണ് അഫ്‌സലിന് വെടിയേറ്റത്. ജൂൺ 20 വ്യാഴാഴ്ച പ്രോസ്‌പെക്റ്റ് ഹൈറ്റ്‌സിലെ ലിങ്കൺ പ്ലേസ് അപ്പാർട്ട്‌മെൻ്റ് കെട്ടിടത്തിന് പുറത്ത് കറുത്ത മെഴ്‌സിഡസ് ബെൻസിൻ്റെ ഡ്രൈവിംഗ് സീറ്റിലാണ് നവീദ് അഫ്സലിനെ മരിച്ച നിലയിൽ കണ്ടെത്തിയതെന്ന് പോലീസ് പ്രസ്താവനയിൽ പറഞ്ഞു.
എന്താണ് വെടിവയ്പ്പിലേക്ക് നയിച്ചതെന്ന് വ്യക്തമല്ല. എന്നാൽ രണ്ട് യാത്രക്കാർ കാറിൻ്റെ പിൻസീറ്റിൽ കയറി ഒരാൾ തോക്ക് ചൂണ്ടി വെടിവയ്ക്കുകയായിരുന്നുവെന്ന് പോലീസ് പറഞ്ഞു.
ഇഎംഎസ് പ്രവർത്തകർ അഫ്സലിനെ ഗുരുതരാവസ്ഥയിൽ ന്യൂയോർക്ക്-പ്രസ്ബിറ്റീരിയൻ ബ്രൂക്ലിൻ മെത്തഡിസ്റ്റ് ആശുപത്രിയിൽ എത്തിച്ചെങ്കിലും മൂന്ന് ദിവസത്തിന് ശേഷം അദ്ദേഹം മരിച്ചുവെന്ന് പോലീസ് പറഞ്ഞു.
