ന്യൂഡല്‍ഹി: കഴിഞ്ഞ നിയമസഭാ തെരഞ്ഞെടുപ്പില്‍ ഇന്ത്യ സഖ്യത്തെ നിര്‍ണായക വിജയത്തിലേക്ക് നയിച്ചതിന് പിന്നാലെ ജാര്‍ഖണ്ഡ് മുഖ്യമന്ത്രിയായി ഹേമന്ത് സോറന് ഇന്ന് സത്യപ്രതിജ്ഞ ചെയ്യും. ജാര്‍ഖണ്ഡ് ഗവര്‍ണര്‍ സന്തോഷ് കുമാര്‍ ഗാംഗ്വാര്‍ ഇന്ന് ഹേമന്ത് സോറന് സത്യവാചകം ചൊല്ലിക്കൊടുക്കും. ഇത് നാലാം തവണയാണ് 49-കാരനായ സോറന് സത്യപ്രതിജ്ഞ ചെയ്യുന്നത്. ജാര്‍ഖണ്ഡിന്റെ തലസ്ഥാനമായ റാഞ്ചിയിലെ മൊര്‍ഹബാദി ഗ്രൗണ്ടിലാണ് ഇന്ന് സത്യപ്രതിജ്ഞ നടക്കുക. ഇന്ത്യന്‍ ബ്ലോക്കിന്റെ ഉന്നത നേതാക്കള്‍ പങ്കെടുക്കുമെന്ന് പ്രതീക്ഷിക്കുന്നു.
കോണ്‍ഗ്രസ് അധ്യക്ഷന്‍ മല്ലികാര്‍ജുന്‍ ഖാര്‍ഗെ, പാര്‍ട്ടി നേതാവ് രാഹുല്‍ ഗാന്ധി, എന്‍സിപി അധ്യക്ഷന്‍ ശരദ് പവാര്‍, പശ്ചിമ ബംഗാള്‍ മുഖ്യമന്ത്രി മമത ബാനര്‍ജി, മേഘാലയ മുഖ്യമന്ത്രി കോണ്‍റാഡ് സാംഗ്മ, പഞ്ചാബ് മുഖ്യമന്ത്രി ഭഗവന്ത് മാന്‍, ഹിമാചല്‍ പ്രദേശ് മുഖ്യമന്ത്രി സുഖ്വീന്ദര്‍ സിങ് സുഖു എന്നിവര്‍ ചടങ്ങില്‍ പങ്കെടുക്കും.
കഴിഞ്ഞയാഴ്ച നേടിയ നിര്‍ണ്ണായക വിജയത്തോടെ ഇന്ത്യാ സഖ്യം ജാര്‍ഖണ്ഡില്‍ തുടര്‍ച്ചയായ രണ്ടാം തവണയും കരുത്ത് തെളിയിക്കുകയായിരുന്നു.
എന്നാല്‍ ഇന്ന് സംസ്ഥാനത്ത് അധികാരമേല്‍ക്കുന്നത് സോറന് മാത്രമായിരിക്കും. സോറന്റെ ജാര്‍ഖണ്ഡ് മുക്തി മോര്‍ച്ചയ്ക്കോ ജെഎംഎമ്മിനോ സഖ്യകക്ഷിയായ കോണ്‍ഗ്രസില്‍ നിന്നോ ഇതുവരെ മറ്റ് മന്ത്രിമാരുടെ പട്ടികയൊന്നും ലഭിച്ചിട്ടില്ല. പുതിയ സര്‍ക്കാര്‍ വിശ്വാസവോട്ട് നേടിയതിന് ശേഷം അടുത്തയാഴ്ച മന്ത്രിസഭ വിപുലീകരിക്കുമെന്ന് വൃത്തങ്ങള്‍ സൂചിപ്പിച്ചു. മുഖ്യമന്ത്രി സ്ഥാനത്തിന് പുറമെ ആറ് മന്ത്രിസ്ഥാനങ്ങളും ജെഎംഎം നിലനിര്‍ത്തുമെന്നാണ് കരുതുന്നത്. കോണ്‍ഗ്രസിന് നാല് സീറ്റുകളും തേജസ്വി യാദവിന്റെ രാഷ്ട്രീയ ജനതാദളിന് ഒരു സീറ്റും ലഭിക്കുമെന്നും വിവരമുണ്ട്. രണ്ട് എം.എല്‍.എമാരുള്ള സി.പി.ഐ-എം.എല്‍ സര്‍ക്കാറിന് പുറത്തുനിന്ന് പിന്തുണ നല്‍കും.
