കൊച്ചി: പൂക്കോട് വെറ്ററിനറി കോളേജിലെ വിദ്യാർഥിയായിരുന്ന സിദ്ധാര്‍ത്ഥന്റെ മരണം ഗുരുതര സംഭവമാണെന്ന നീരീക്ഷണവുമായി കേരള ഹൈക്കോടതി. ക്യാമ്പസിനകത്ത് നിരവധി കുട്ടികളുടെ മുന്നിലാണ് ക്രൂരമായ സംഭവം. മനുഷ്യത്വരഹതിമായ പീഡനത്തിനാണ് സിദ്ധാര്‍ത്ഥന്‍ ഇരയായത്. ആക്രമണം തടയാതിരുന്ന ഉദ്യോഗസ്ഥരും നടപടി നേരിടണമെന്നും കോടതി വ്യക്തമാക്കി. ഗവര്‍ണര്‍ സസ്‌പെന്‍ഡ് ചെയ്തത് ചോദ്യം ചെയ്ത് മുന്‍ വിസി എം ആര്‍ ശശീന്ദ്രനാഥിന്റെ ഹര്‍ജി തള്ളിയായിരുന്നു ഹൈക്കോടതിയുടെ നിരീക്ഷണം. വൈസ് ചാന്‍സലര്‍ക്കെതിരെ നടപടിയെടുക്കാന്‍ ചാന്‍സലറായ ഗവര്‍ണര്‍ക്ക് അധികാരമുണ്ടെന്നും കോടതി വ്യക്തമാക്കി. മാതാപിതാക്കൾ ആവശ്യപ്പെട്ടതിനെ തുടർന്ന് സിദ്ധാര്‍ത്ഥന്റെ മരണത്തില്‍ സിബിഐ ആണ് ഇപ്പോള്‍ കേസ് അന്വേഷിക്കുന്നത്.
അതിനിടെ സിദ്ധാർഥന്‍റെ മരണത്തിൽ സി ബി ഐ പ്രാഥമിക കുറ്റപത്രം സമർപ്പിച്ചു. എറണാകുളം സി ജെ എം കോടതിയിലാണ് സി ബി ഐ കുറ്റപത്രം സമർപ്പിച്ചത്. അറസ്റ്റിലായ പ്രതികൾക്ക് ജാമ്യം ലഭിക്കാതിരിക്കാനാണ് സി ബി ഐ വേഗത്തിൽ കുറ്റപത്രം സമർപ്പിച്ചത്. കേസന്വേഷണം പുരോഗമിക്കുകയാണെന്നും സി ബി ഐ കോടതിയെ അറിയിച്ചു.
