വാഷിംഗ്ടൺ: അമേരിക്കൻ വൈസ് പ്രസിഡൻ്റ് കമലാ ഹാരിസ് തിങ്കളാഴ്ച ഡോണൾഡ് ട്രംപിനെതിരെ വ്യക്തിപരമായ ആക്രമണം നടത്തി തൻ്റെ തിരഞ്ഞെടുപ്പ് പ്രചാരണം ആരംഭിച്ചു. നവംബറിൽ നടക്കാനിരിക്കുന്ന തിരഞ്ഞെടുപ്പിൽ വിജയിക്കുമെന്ന് കമല ഹാരിസ് ആത്മവിശ്വാസം പ്രകടിപ്പിച്ചു.
“നവംബറിൽ നമ്മൾ വിജയിക്കും,” ഡെലവെയറിലെ വിൽമിംഗ്ടണിലെ പ്രചാരണ ആസ്ഥാനത്ത് നടത്തിയ ഉജ്ജ്വലമായ പ്രസംഗത്തിൽ പുഞ്ചിരിച്ചുകൊണ്ക് കമല ഹാരിസ് പ്രചാരണ പ്രവർത്തകരോട് പറഞ്ഞു.
ട്രംപിനെതിരെ ആഞ്ഞടിച്ച കമല ഹാരിസ്, കാലിഫോർണിയയിലെ ചീഫ് പ്രോസിക്യൂട്ടർ എന്ന നിലയിൽ തൻ്റെ മുൻകാല ജോലിയെക്കുറിച്ച് പരാമർശിച്ചു, “എല്ലാ തരത്തിലുമുള്ള കുറ്റവാളികളെയും ഞാൻ നേരിട്ടിട്ടുണ്ട്” എന്ന് അവർ പറഞ്ഞു.
“സ്ത്രീകളെ ഉപദ്രവിക്കുന്നവർ. ഉപഭോക്താക്കളെ കബളിപ്പിച്ച വഞ്ചകർ. സ്വന്തം നേട്ടത്തിനായി നിയമ ലംഘനം നടത്തിയവർ. അതിനാൽ ഡൊണാൾഡ് ട്രംപിൻ്റെ തരം എനിക്കറിയാം എന്ന് ഞാൻ പറയുമ്പോൾ വിശ്വസിക്കൂ,” കമല ഹാരിസ് പറഞ്ഞു.
ഗർഭച്ഛിദ്രം പോലുള്ള വിഷയങ്ങളിൽ താൻ കൂടുതൽ ശ്രദ്ധ കേന്ദ്രീകരിക്കുമെന്ന് കമല ഹാരിസ് പ്രതിജ്ഞയെടുത്തു. നടപടിക്രമത്തിനുള്ള ദീർഘകാല ഫെഡറൽ അവകാശം അസാധുവാക്കാനുള്ള സുപ്രീം കോടതിയുടെ 2022 തീരുമാനത്തെ ട്രംപ് പ്രശംസിച്ചതിന് പിന്നാലെയാണ് കമലയുടെ നീക്കം.
