കോഴിക്കോട്: ഹൈദരാബാദിലെ കറന്‍സി ചെസ്റ്റിലേക്ക് പണം കൊണ്ട് പോകുന്നതില്‍ സുരക്ഷ വീഴ്ച വരുത്തിയ കോഴിക്കോട് അസി. കമ്മീഷണര്‍ക്ക് സസ്പെന്‍ഷന്‍. ജില്ലാ ക്രൈം റെക്കോര്‍ഡ്സ് ബ്യൂറോ (ഡിസിആര്‍ബി) അസിസ്റ്റന്റ് കമ്മീഷണര്‍ ടി.പി ശ്രീജിത്തിനെയാണ് സസ്പെന്‍ഡ് ചെയ്തത്. ക്യാഷ് എസ്‌കോര്‍ട്ട് ഡ്യൂട്ടിയില്‍ ചട്ടങ്ങള്‍ പാലിച്ചില്ലെന്ന കണ്ടെത്തലിനെ തുടര്‍ന്നാണ് സസ്പെന്‍ഷന്‍.
ഹൈദരാബാദിലെ കറന്‍സി ചെസ്റ്റിലേക്ക് പണം കൊണ്ട് പോകുന്നതിനുള്ള സുരക്ഷ ചുമതല ഇദ്ദേഹത്തിനായിരുന്നു. എന്നാല്‍ പണം കൊണ്ടുപോകുമ്പോള്‍ സുരക്ഷാ വീഴ്ച വരുത്തിയെന്നാണ് ആരോപണം. കറന്‍സിയുമായി പോയ വാഹനത്തിന് അകമ്പടി പോകാന്‍ ഔദ്യോഗിക വാഹനം ഉപയോഗിച്ചില്ല, സര്‍വീസ് പിസ്റ്റള്‍ കൈവശം വെച്ചില്ല തുടങ്ങിയ കുറ്റങ്ങളാണ് ഇദ്ദേഹത്തിനെതിരെയുള്ളത്. റിസര്‍വ് ബാങ്കിന്റെ ചട്ടങ്ങള്‍ ലംഘിച്ച് 750 കോടി രൂപ കൊണ്ടുപോയതിലാണ് നടപടി.
മൈസൂര്‍ മുതല്‍ തെലങ്കാന വരെയുള്ള ബാങ്ക് കറന്‍സി നീക്കത്തിലാണ് സുരക്ഷാ വീഴ്ചയുണ്ടായതായി കണ്ടെത്തിയത്. യൂണിഫോം ധരിച്ചില്ല, സര്‍വീസ് പിസ്റ്റള്‍ കൈവശം സൂക്ഷിച്ചില്ല, പണം നിറച്ച ട്രക്കുമായി യാത്ര ചെയ്യുമ്പോള്‍ സ്വന്തം നിലയ്ക്ക് ഏര്‍പ്പാടാക്കിയ വാഹനത്തില്‍ യാത്ര ചെയ്തു, സുരക്ഷാവീഴ്ച, കടുത്ത കൃത്യവിലോപം, അച്ചടക്ക ലംഘനം, ഉത്തരവാദിത്തമില്ലായ്മ തുടങ്ങിയ കുറ്റങ്ങളാണ് കോഴിക്കോട് ഡിസിആര്‍ബി അസിസ്റ്റന്റ് കമ്മീഷണര്‍ ടി.പി ശ്രീജിത്തിനെതിരെ കണ്ടെത്തിയിട്ടുള്ളത്.
