തിരുവനന്തപുരം: ലോകചാമ്പ്യന്മാരായ സാക്ഷാൽ ലയണൽ മെസിയുടെ അർജന്റീന കേരളത്തിൽ പന്തുതട്ടാനെത്തുമോ? കേരളത്തിലെ കാൽപ്പന്ത് പ്രേമികൾ കഴിഞ്ഞ കുറച്ചുകാലമായി ചോദിക്കുന്ന ചോദ്യത്തിന് ഒടുവിൽ ഉത്തരമായി. കേരളത്തിൽ കളിക്കാൻ തയ്യാറാണെന്ന് അർജൻറീന ഫുട്ബോൾ ടീം അറിയിച്ചതായി റിപ്പോർട്ട്. ടീം അടുത്ത വർഷമാകും കേരളത്തിൽ പന്തുതട്ടാനെത്തുക. ഔദ്യോഗിക പ്രഖ്യാപനം കായിക മന്ത്രി വി അബ്ദുറഹ്മാന്‍ നാളെ നടത്തുമെന്നാണ് വിവരം. ഫുട്ബോള്‍ പ്രേമികളെ ആവേശത്തിലാക്കുന്ന വാര്‍ത്തയ്ക്കായി രാജ്യമൊട്ടാകെ ആവേശത്തോടെ കാത്തിരിക്കുകയാണ്. അർജന്റീന ടീം കേരളത്തിലെത്തുമെന്നു നേരത്തെ തന്നെ റിപ്പോര്‍ട്ടുകളുണ്ടായിരുന്നു. ഇന്ന് ഇക്കാര്യത്തിൽ ഏറെക്കുറെ സ്ഥിരീകരണമായിട്ടുണ്ട്.
തിരുവനന്തപുരത്തും കൊച്ചിയിലുമായിരിക്കും മത്സരങ്ങൾ നടക്കുക. അതേസമയം സൂപ്പർ താരം ലയണൽ മെസി ടീമിനൊപ്പം ഉണ്ടാകുമോ എന്നകാര്യത്തിൽ ആകാംക്ഷ തുടരുകയാണ്. മെസി കളിക്കണോ, വേണ്ടയോ എന്ന് ആ സമയത്ത് അർജന്റീന ഫുട്ബോൾ അസോസിയേഷനായിരിക്കും തീരുമാനിക്കുക. അർജന്റീനയും നേരിടാനുള്ള ടീമും കേരളത്തിൽ മത്സരിക്കുന്നതിന്റെ ചെലവു മുഴുവൻ സ്പോൺസർഷിപ്പിലൂടെ കണ്ടെത്താനാണ് തീരുമാനം. ഏഷ്യയിലെ പ്രമുഖ ടീമുമായും ദേശീയ ടീമുമായും ഓരോ മത്സരങ്ങൾ കളിച്ചേക്കും. ഈ വർഷം സെപ്റ്റംബറിൽ അർജന്റീന ഫുട്ബോൾ ടീമിനെ കേരളത്തിലേക്ക് ക്ഷണിക്കാൻ കായിക മന്ത്രി വി അബ്ദുറഹിമാൻ സ്പെയിനിലേക്ക് പോയിരുന്നു. ഈ സന്ദർശനത്തെ തുടർന്നാണ് അർജന്റീന തീരുമാനമെടുത്തത്.
നേരത്തേ സൗഹൃദമത്സരം കളിക്കാനുള്ള അർജന്റീനയുടെ ക്ഷണം ഇന്ത്യൻ ഫുട്ബോൾ അസോസിയേഷൻ നിരസിച്ചിരുന്നു. മത്സരത്തിന് ആതിഥേയത്വം വഹിക്കാനുള്ള ഉയർന്ന ചെലവായിരുന്നു എ.ഐ.എഫ്.എഫിന്റെ പിന്മാറ്റത്തിന് കാരണമായി പറഞ്ഞിരുന്നത്. ഇതോടെ അർജന്റീനാ ടീമിനെ സൗഹൃദ മത്സരത്തിനായി കേരളത്തിലേക്ക് സ്വാഗതം ചെയ്ത് മന്ത്രി രംഗത്തെത്തിയിരുന്നു. ടീമിനെ കേരളത്തിലേക്ക് ക്ഷണിച്ച് മന്ത്രി, അർജന്റീന ഫുട്ബോൾ അസോസിയേഷൻ പ്രസിഡന്റ് ക്ലോഡിയോ ടാപിയക്ക് കത്തയക്കുകയും ചെയ്തിരുന്നു. പിന്നീടാണ് സന്ദർശനം നടത്തിയത്. ഏകദേശം 100 കോടിയാണ് അർജന്റീന ടീം കേരളത്തിൽ കളിക്കാൻ വേണ്ടിവരുന്ന ചിലവ്. ഇത് സ്പോൺസർഷിപ്പിലൂടെ നേടാമെന്നാണ് പ്രതീക്ഷ.
