ന്യൂഡല്‍ഹി: ഈ വര്‍ഷത്തെ റിപ്പബ്ലിക് ദിന പരേഡിലെ മുഖ്യാതിഥി ഇമ്മാനുവല്‍ മാക്രോണ്‍ ഇന്ത്യന്‍ വിദ്യാര്‍ത്ഥികള്‍ക്ക് റിപ്പബ്ലിക് ദിന സമ്മാനമായി ഒരു പ്രഖ്യാപനം നടത്തി. ഫ്രാന്‍സില്‍ കൂടുതല്‍ ഇന്ത്യന്‍ വിദ്യാര്‍ത്ഥികള്‍ പഠിക്കുന്നത് അവസരം ഉറപ്പാക്കാനുള്ള നടപടികള്‍ എടുക്കുമെന്ന് അദ്ദേഹം വ്യക്തമാക്കി. 2030 ഓടെ 30,000 ത്തിലധികം ഇന്ത്യന്‍ വിദ്യാര്‍ത്ഥികളെ ഫ്രാന്‍സില്‍ എത്തിക്കും എന്നതാണ് ഫ്രാന്‍സിന്റെ ലക്ഷ്യമെന്ന് അദ്ദേഹം പറഞ്ഞു.
‘2030-ല്‍ ഫ്രാന്‍സില്‍ 30,000 ഇന്ത്യന്‍ വിദ്യാര്‍ത്ഥികള്‍ ഉണ്ടാകണം, ഇത് വളരെ അഭിലഷണീയമായ ലക്ഷ്യമാണ്, പക്ഷേ അത് സാധ്യമാക്കാന്‍ ഞാന്‍ ദൃഢനിശ്ചയത്തിലാണ്,’ മാക്രോണ്‍ എക്സിലെ ഒരു പോസ്റ്റില്‍ പറഞ്ഞു.
ഫ്രാന്‍സ് വിദ്യാര്‍ത്ഥികളെ എങ്ങനെ സഹായിക്കുമെന്ന് വിശദീകരിച്ച മാക്രോണ്‍, ഫ്രഞ്ച് സംസാരിക്കാത്ത വിദ്യാര്‍ത്ഥികള്‍ക്ക് അവിടുത്തെ സര്‍വ്വകലാശാലകളില്‍ പഠിക്കാന്‍ അനുവദിക്കുന്നതിന് അന്താരാഷ്ട്ര ക്ലാസുകള്‍ സ്ഥാപിക്കുമെന്നും പറഞ്ഞു.
ഫ്രാന്‍സില്‍ പഠിച്ച ഏതൊരു മുന്‍ ഇന്ത്യന്‍ വിദ്യാര്‍ത്ഥികള്‍ക്കും വിസ പ്രക്രിയ സുഗമമാക്കുമെന്നും ഫ്രഞ്ച് പ്രസിഡന്റ് കൂട്ടിച്ചേര്‍ത്തു.
