കൊച്ചി: കൊച്ചിയിലെത്തിയ പ്രധാനമന്ത്രി നരേന്ദ്രമോദി ഇന്ന് കൊച്ചിയില് നാലായിരം കോടിയുടെ മൂന്ന് വന്കിട പദ്ധതികള് ഉദ്ഘാടനം ചെയ്യും. കൊച്ചി കപ്പല്ശാലയിലെ പുതിയ ഡ്രൈ ഡോക്ക്, അന്താരാഷ്ട്ര കപ്പല് അറ്റകുറ്റപ്പണിശാല എന്നിവയും ഇന്ത്യന് ഓയില് കോര്പ്പറേഷന്റെ എല് പി ജി ഇംപോര്ട്ട് ടെര്മിനലുമാണ് പ്രധാനമന്ത്രി ഇന്ന് രാജ്യത്തിന് സമര്പ്പിക്കുക. ഉച്ചയ്ക്ക് 12 മണിയോടെയാണ് പ്രധാനമന്ത്രി കപ്പല്ശാലയിലെ പുതിയ ഡ്രൈ ഡോക്ക് ഉദ്ഘാടനം ചെയ്യുക.
1799 കോടി രൂപ ചിലവിലാണ് കൊച്ചി കപ്പല് ശാലയില് പുതിയ ഡ്രൈ ഡോക്ക് നിര്മ്മാണം പൂര്ത്തിയായത്. 970 കോടി രൂപ ചെലവഴിച്ചാണ് രാജ്യാന്തര കപ്പല് അറ്റകുറ്റപ്പണി ശാല ഒരുക്കിയത്. വെല്ലിംഗ്ടണ് ഐലന്ഡിലെ കൊച്ചിന് പോര്ട്ട് അതോറിറ്റിയുടെ 42 ഏക്കര് ഭൂമി പാട്ടത്തിനെടുത്താണ് അറ്റകുറ്റപ്പണിശാല സജ്ജമാക്കിയത്. 1236 കോടി രൂപ ചെലവഴിച്ചാണ് ഐഒസിയുടെ പുതിയ എല് പി ജി ഇംപോര്ട്ട് ടെര്മിനല് സ്ഥാപിച്ചിട്ടുള്ളത്.
