ന്യൂഡല്ഹി: കള്ളപ്പണം വെളുപ്പിക്കല് അന്വേഷണത്തിന്റെ ഭാഗമായി എന്ഫോഴ്സ്മെന്റ് ഡയറക്ടറേറ്റ് റെയ്ഡ് ചെയ്യുന്ന ആം ആദ്മി പാര്ട്ടിയുമായി ബന്ധമുള്ളവരില് ഡല്ഹി മുഖ്യമന്ത്രി അരവിന്ദ് കെജ്രിവാളിന്റെ പേഴ്സണല് സെക്രട്ടറിയും രാജ്യസഭാ എംപിയും ഉള്പ്പെടുന്നുവെന്ന് വൃത്തങ്ങള് അറിയിച്ചു.
ഡല്ഹി, ചണ്ഡീഗഡ്, വാരണാസി എന്നിവിടങ്ങളിലെ 12 ഓളം സ്ഥലങ്ങളില് ഇഡി ഉദ്യോഗസ്ഥര് നിലവില് പരിശോധന നടത്തുന്നുണ്ട്.
കെജ്രിവാളിന്റെ പേഴ്സണല് സെക്രട്ടറി ബിഭാവ് കുമാര്, രാജ്യസഭാ എംപി എന്ഡി ഗുപ്ത, മുന് ഡല്ഹി ജല് ബോര്ഡ് അംഗം ശലഭ് കുമാര് എന്നിവരും റെയ്ഡ് ചെയ്യപ്പെട്ടവരില് ഉള്പ്പെടുന്നു.
അതേസമയം, തങ്ങള് ഭയപ്പെടുന്നില്ലെന്നും ഒരു ക്രമക്കേടും നടന്നിട്ടില്ലെന്നും പ്രതികളെ സര്ക്കാര് സാക്ഷിയാക്കാന് ഇ.ഡി ശ്രമിക്കുന്നുവെന്നും ഡല്ഹി മന്ത്രി അതിഷി ഇന്ന് രാവിലെ പത്രസമ്മേളനത്തില് പറഞ്ഞു.
