തിരുവനന്തപുരം: സിപിഎമ്മിന്റെ തൃശൂര്‍ ജില്ലാ കമ്മിറ്റിയുടെ പേരിലുളള ബാങ്ക് ഓഫ് ഇന്ത്യയിലെ അക്കൗണ്ട് ആദായ നികുതി വകുപ്പ് മരവിപ്പിച്ച നടപടിയില്‍ പ്രതിഷേധം പ്രകടിപ്പിച്ച് സിപിഎം സംസ്ഥാന സെക്രട്ടറി എം.വി ഗോവിന്ദന്‍. ബാങ്ക് അക്കൗണ്ടുകള്‍ എല്ലാം തന്നെ നിയമാനുസൃതമാണെന്നും നടപടിക്കെതിരെ നിയമ നടപടി സ്വീകരിക്കുമെന്നും അദ്ദേഹം പറഞ്ഞു.
നിയമപരമായി ചെയ്യാനുള്ളതെല്ലാം ചെയ്യുമെന്നും തൃശ്ശൂരില്‍ പ്രധാനമന്ത്രി സ്ഥിരതാമസമാക്കട്ടെയെന്നും അദ്ദേഹം പരിഹാസിച്ചു. മാത്രമല്ല എല്ലാ ഇടപാടുകളും സുതാര്യമാണെന്നും അദ്ദേഹം വ്യക്തമാക്കി. ഇഡിയും ആദായനികുതി വകുപ്പും കാണിക്കുന്നത് ഗുണ്ടായിസമാണെന്നും അദ്ദേഹം കൂട്ടിച്ചേര്‍ത്തു.
അതേസമയം പാര്‍ട്ടിക്ക് ഒരു രഹസ്യ അക്കൗണ്ടുമില്ലെന്നായിരുന്നു കഴിഞ്ഞ ദിവസം മുഖ്യമന്ത്രി പറഞ്ഞിരുന്നത്. ഇതിനു പിന്നാലെയാണ് ഒരു അക്കൗണ്ട് മരവിപ്പിച്ച് ആദായനികുതി വകുപ്പിന്റെ നടപടി എത്തിയത്.
