തിരുവനന്തപുരം: എം പിയായി തിരഞ്ഞെടുക്കപ്പെട്ട കെ രാധാകൃഷ്ണന് പകരം മാനന്തവാടി എം എല്‍ എ ഒ ആര്‍ കേളു മന്ത്രിയാവും. ഇന്ന് ചേർന്ന സി പി എം സംസ്ഥാന സെക്രട്ടറിയേറ്റ് യോഗമാണ് ഇക്കാര്യം തീരുമാനിച്ചത്. പട്ടികജാതി ക്ഷേമ വകുപ്പാണ് ഒ ആര്‍ കേളുവിനു ലഭിക്കുക. ഇതിനൊപ്പം തന്നെ മന്ത്രിമാരുടെ വകുപ്പുകളിലും മാറ്റം ഉണ്ട്. ദേവസ്വം വകുപ്പ് വി എന്‍ വാസവനും പാര്‍ലിമെന്ററി കാര്യം എം ബി രാജേഷനിനും നല്‍കാനാണ് തീരുമാനിച്ചരിക്കുന്നത്.
സി പി എം സംസ്ഥാന കമ്മിറ്റി അംഗവും ആദിവാസി ക്ഷേമസമിതി നേതാവുമാണ് കേളു. പട്ടിക വര്‍ഗ വിഭാഗത്തില്‍ നിന്നുളള സി പി എമ്മിന്റെ ആദ്യത്തെ മന്ത്രി എന്ന വിശേഷണം കൂടി കേളുവിന്‌ ലഭിക്കും. വയനാടിന് മന്ത്രിസഭയിൽ പ്രതിനിത്യം ലഭിച്ചു എന്നതാണ് മറ്റൊരു ശ്രേദ്ധേയമായ കാര്യം.
വയനാട് ജില്ലയില്‍നിന്ന് സി പി എം സംസ്ഥാന സമിതിയിലെത്തിയ ആദ്യ പട്ടികവര്‍ഗ നേതാവാണ് ഒ ആര്‍ കേളു. കുറിച്യ സമുദായക്കാരനായ കേളു പട്ടികജാതി-പട്ടികവര്‍ഗ പിന്നാക്ക ക്ഷേമം സംബന്ധിച്ച നിയമസഭാ സമിതിയുടെ ചെയര്‍മാന്‍ കൂടിയാണ്. തിരുനെല്ലി ഗ്രാമപഞ്ചായത്തിലെ ഇടയൂര്‍ക്കുന്ന് വാര്‍ഡില്‍നിന്ന് 2000 ല്‍ ഗ്രാമപഞ്ചായത്ത് അംഗമായി കേളു തിരഞ്ഞെടുക്കപ്പെട്ടിട്ടുണ്ട്. 2005 ലും 2010 ലുമായി 10 വര്‍ഷം തിരുനെല്ലി ഗ്രാമപഞ്ചായത്ത് പ്രസിഡന്റായി. പിന്നീട് 2015 ല്‍ തിരുനെല്ലി ഡിവിഷനില്‍നിന്ന് മാനന്തവാടി ബ്ലോക്ക് പഞ്ചായത്ത് അംഗം. 2016 ലെ നിയമസഭാ തിരഞ്ഞെടുപ്പില്‍, മന്ത്രിയായിരുന്ന പി കെ ജയലക്ഷ്മിയെ തോല്‍പിച്ച് മാനന്തവാടി നിയോജക മണ്ഡലം എം എല്‍ എയായി. 2021ലും വിജയം ആവര്‍ത്തിച്ചു.
