ന്യൂഡല്ഹി: ജനപക്ഷം പാര്ട്ടിയും പി സി ജോര്ജും ബിജെപിയില് ചേര്ന്നു. ഡല്ഹി ബിജെപി ആസ്ഥാനത്തു വെച്ച് പിസി ജോര്ജും മകന് ഷോണ് ജോര്ജും ബിജെപി അംഗത്വം സ്വീകരിച്ചു. ജനപക്ഷം സെക്കുലര് പാര്ട്ടി നേതാവും പൂഞ്ഞാര് എംഎല്എയുമായിരുന്ന പി സി ജോര്ജ് കഴിഞ്ഞ ദിവസമാണ് ബിജെപിയിലേക്കുള്ള പ്രവേശനത്തെക്കുറിച്ച് പ്രഖ്യാപിച്ചത്. അംഗത്വമെടുത്ത് ഔദ്യോഗിക ബിജെപി അംഗമാകാന് തന്നെയാണ് എല്ലാ ജനപക്ഷം അംഗങ്ങളും താല്പ്പര്യപ്പെടുന്നതെന്നും പി സി ജോര്ജ് വ്യക്തമാക്കിയിരുന്നു.
കോട്ടയം ജില്ലാ പഞ്ചായത്തംഗവും പി സി ജോര്ജിന്റെ മകനുമായ അഡ്വ. ഷോണ് ജോര്ജും, ജനപക്ഷം പാര്ട്ടി സെക്രട്ടറി ജോര്ജ് ജോസഫും ബിജെപി ദേശീയ നേതാക്കളില് നിന്ന് അംഗത്വം സ്വീകരിച്ചു. കേന്ദ്രമന്ത്രിമാരായ രാജീവ് ചന്ദ്രശേഖര്, വി മുരളീധരന്, ഒപ്പം കേരളത്തിന്റെ ചുമതലയുള്ള പ്രഭാരി പ്രകാശ് ജാവഡേക്കര്, അനില് ആന്റണി എന്നിവരുടെ സാന്നിധ്യത്തിലായിരുന്നു പാര്ട്ടി പ്രവേശനം. വൈകിട്ട് കേന്ദ്ര ആഭ്യന്തരമന്ത്രി അമിത് ഷാ, ദേശീയ അദ്ധ്യക്ഷന് ജെ പി നദ്ദ എന്നിവരുമായി പി സി ജോര്ജ് കൂടിക്കാഴ്ച നടത്തും.
