ബിജെപി പ്രവേശന ചര്‍ച്ചാ വിവാദത്തില്‍ എല്‍ ഡി എഫ് കണ്‍വീനര്‍ ഇ പി ജയരാജന് താക്കീതുമായി മുഖ്യമന്ത്രി പിണറായി വിജയന്‍. പിണറായിയില്‍ വോട്ട് രേഖപ്പെടുത്തിയ ശേഷം മാധ്യമങ്ങളോട് പ്രതികരിക്കുകയായിരുന്നു മുഖ്യമന്ത്രി.
‘ഇ പി ജയരാജന്റെ പ്രകൃതം എല്ലാവര്‍ക്കും അറിയാല്ലോ, എല്ലാവരുമായി കൂട്ടുകൂടും. നമ്മൂടെ നാട്ടില്‍ ഒരു ചൊല്ലുണ്ട്. പാപിയുമായി ശിവന്‍ കൂട്ടുകൂടിയാല്‍ ശിവനും പാപിയായി മാറുമെന്ന്. കൂട്ടുകെട്ടുകളില്‍ ജാഗ്രതപുലര്‍ത്തണം. ഉറക്കം തെളിഞ്ഞാല്‍ ആരെ പറ്റിക്കാം എന്ന് ആലോചിക്കുന്ന ചിലരുണ്ട്. അത്തരം ആളുകളുമായി ഉള്ള ലോഹ്യം, അല്ലെങ്കില്‍ കൂട്ടുകെട്ട്, സൗഹൃദം എന്നിവ സാധാരണഗതിയില്‍ ശ്രദ്ധിക്കേണ്ടതാണ്. സഖാവ് ഇപി ജയരാജന് ഇത്തരം കാര്യങ്ങളില്‍ ജാഗ്രത പുലര്‍ത്താറില്ലെന്ന് നേരത്തെയുള്ള അനുഭവമാണ്. ഇത്തരം ആളുകളുമായുള്ള കൂട്ടുകെട്ടുകളില്‍ ഇപി ജയരാജന് ശ്രദ്ധിക്കണം.’ മുഖ്യമന്ത്രി പറഞ്ഞു.
ഇ പി ജയരാജനെ ലക്ഷ്യംവച്ച് നടത്തിയ ഈ ആക്രമണവും ആരോപണവും സിപിഎമ്മിനെ ലക്ഷ്യം വെച്ചുകൊണ്ടുള്ളതാണ്. അത് ജനം തിരിച്ചറിഞ്ഞ് തള്ളിക്കളയും. തിരഞ്ഞെടുപ്പിന്റെ ഘട്ടം വരുമ്പോള്‍ തെറ്റായ പ്രചാരണം അഴിച്ചുവിടാറുണ്ട്. അതിന്റെ ഭാഗമായുള്ള ആരോപണം മാത്രമാണിത്. മുഖ്യമന്ത്രി പറഞ്ഞു.
Pinarayi Vijayan On EP Jayarajan BJP Controversy
