തിരുവനന്തപുരം: വയനാട് പൂക്കോട് വെറ്റിനറി കോളജിലെ വിദ്യാര്ത്ഥി ആത്മഹത്യ ചെയ്ത സംഭവത്തില് സര്ക്കാരിനെതിരെ രൂക്ഷ വിമര്ശനവുമായി പ്രതിപക്ഷ നേതാവ് വിഡി സതീശന്. കേട്ടുകേള്വിയില്ലാത്ത രീതിയില് നൂറുകണക്കിന് കുട്ടികളുടെ മുന്നില് വിവസ്ത്രനാക്കി ബെല്റ്റും കമ്പിവടിയും ഉപയോഗിച്ചാണ് സിദ്ധാര്ത്ഥിനെ തല്ലിക്കൊന്നത്. ടി പി ചന്ദ്രശേഖരനെ ക്രൂരമായി കൊലപ്പെടുത്താന് ഗൂഡാലോചന നടത്തിയ സി പി എം നേതാക്കള് വളര്ത്തിയെടുക്കുന്ന എസ് എഫ് ഐ ഏറ്റവും വലിയ ക്രിമിനലുകളായി മാറിക്കൊണ്ടിരിക്കുകയാണെന്നും അദ്ദേഹം ആരോപിച്ചു.
പ്രതികളെ പൊലീസ് സംരക്ഷിക്കുകയാണെന്നും അറസ്റ്റ് ചെയ്യാതെ എസ്.എഫ്.ഐ നേതാക്കള്ക്ക് ജാമ്യം കിട്ടുന്നതിനുള്ള സൗകര്യം ഒരുക്കിക്കൊടുക്കുകയാണെന്നും ആരോപിച്ച അദ്ദേഹം ടി പിയുടെ തലച്ചോറ് തെങ്ങിന് പൂക്കുല പോലെ ചിതറിക്കുമെന്ന് സി.പി.എം പറഞ്ഞപ്പോള് ചാലക്കുടിയിലെ എസ് ഐയെ പേപ്പട്ടിയെ പോലെ വഴിയിലിട്ട് തല്ലുമെന്നാണ് എസ്.എഫ്.ഐ നേതാക്കള് പറഞ്ഞതെന്നും വിശദീകരിച്ചു.
സിദ്ധാര്ത്ഥിന് സംഭവിച്ചത് തങ്ങളുടെ മക്കള്ക്കും പറ്റുമോയെന്ന ഭീതിയിലാണ് കേരളത്തിലെ രക്ഷിതാക്കള്. അധ്യാപകരെയും പ്രതികളാക്കി യുക്തമായ നടപടി സ്വീകരിക്കണമെന്നും അദ്ദേഹം പറഞ്ഞു.
