ന്യൂഡല്‍ഹി: കോണ്‍ഗ്രസിനും സമാജ്വാദി പാര്‍ട്ടിക്കും ഇന്ത്യന്‍ ബ്ലോക്ക് സഖ്യത്തിനും അവരുടെ ഡിഎന്‍എയില്‍ ‘രാംദ്രോഹ്’ (രാമ ദ്രോഹം) ഉണ്ടെന്ന് ഉത്തര്‍പ്രദേശ് മുഖ്യമന്ത്രി യോഗി ആദിത്യനാഥ്. കോണ്‍ഗ്രസ് നേതാവ് രാധികാ ഖേര പാര്‍ട്ടിയില്‍ നിന്ന് രാജിവെച്ചതുമായി ബന്ധപ്പെട്ടുള്ള പ്രതികരണത്തിലാണ് യോഗി ആദിത്യനാഥ് കോണ്‍ഗ്രസിനെ കടന്നാക്രമിച്ചത്. അയോധ്യയിലെ ശ്രീരാമക്ഷേത്രം സന്ദര്‍ശിച്ചതിന് കോണ്‍ഗ്രസ് അപമാനിച്ചെന്നും ദേഹോപദ്രവം വരെ നേരിടേണ്ടി വന്നെന്നും ആരോപിച്ച് രാധികാ ഖേര കഴിഞ്ഞ ദിവസമാണ് കോണ്‍ഗ്രസില്‍ നിന്നും രാജി വെച്ചത്.
‘രാം ലല്ലയുടെ അനുഗ്രഹം തേടാന്‍ അവര്‍ അയോധ്യയിലെത്തി, കോണ്‍ഗ്രസ് നേതാക്കള്‍ അവളെ അപമാനിച്ചു. അപമാനങ്ങളില്‍ മടുത്താണ് അവര്‍ രാജിവച്ചത്. ഇത് കാണിക്കുന്നത് കോണ്‍ഗ്രസിന്റെയും എസ്പിയുടെയും ഇന്ത്യന്‍ സഖ്യവുമായി ബന്ധപ്പെട്ടവരുടെയെല്ലാം ഡിഎന്‍എയില്‍ ‘രാം ദ്രോഹ്’ ഉണ്ടെന്നാണ്’ യോഗി പറഞ്ഞത്. മാത്രമല്ല, രാജ്യത്തെ ജനങ്ങള്‍ ഒരിക്കലും രാംദ്രോഹികളായവര്‍ക്ക് അനുകൂലമായി വോട്ട് ചെയ്യില്ലെന്നും അദ്ദേഹം പറഞ്ഞു. രാജ്യത്തെ പൊതുജനങ്ങള്‍ക്ക് കോണ്‍ഗ്രസിന്റെ കപട രൂപത്തെക്കുറിച്ച് നന്നായി അറിയാമെന്നും ജനങ്ങളെ കബളിപ്പിക്കാനാണ് അവര്‍ ആഗ്രഹിക്കുന്നതെന്നും പൊതുജനങ്ങള്‍ക്ക് യോഗി ആദിതനാഥ് കൂട്ടിച്ചേര്‍ത്തു.
