സജു വർഗീസ്
ഫിലഡൽഫിയ: ഫോമായുടെ പുതിയ വൈസ് പ്രസിഡൻ്റായി മിന്നും വിജയം കരസ്ഥമാക്കി, പുന്റക്കാനയിലെ ഫോമാ കൺവൻഷൻ സെന്ററിൽ നിന്നും സ്വന്തം സ്ഥലമായ ഫിലാഡൽഫിയയിൽ തിരിച്ചെത്തിയ ഷാലു പുന്നൂസിന് ഉജ്ജ്വല വരവേൽപ്പ് നൽകി. ഫിലഡൽഫിയ മലയാളികളുടെ പ്രിയ സുഹൃത്ത് സുനോജ് മല്ലപ്പള്ളിയുടെ നേതൃത്വത്തിലുള്ള സൗഹൃദ കൂട്ടമാണ് ഫിലഡൽഫിയ രാജ്യാന്തര വിമാനത്താവളത്തിൽ സ്വീകരണം നൽകിയത്.
വിമാനത്താവളത്തിൽ ഷാലുവിനെ സ്വീകരിക്കുവാൻ വളരെ നേരത്തെതന്നെ ഹാരങ്ങളും പൊന്നാടകളുമായി സുഹൃത്തുക്കൾ കാത്തുനിന്നിരുന്നു. വിജയ ശ്രീലാളിതനായി അഭിമാനപൂർവ്വം തിരികെയെത്തിയ തങ്ങളുടെ പ്രിയപ്പെട്ട സുഹൃത്ത് ഷാലു പുന്നൂസിനെയും ഒപ്പം യാത്ര ചെയ്ത കൂട്ടാളികളെയും കണ്ടയുടൻ മുദ്രാവാക്യ വിളികളാൽ മുഖരിതമായി അന്തരീക്ഷം.
എയർപോർട്ട് കവാടത്തിൽ നൽകിയ വമ്പിച്ച സ്വീകരണത്തിന് ശേഷം, നിരവധി വാഹനങ്ങളുടെ അകമ്പടികളോടുകൂടി ഷാലുവിനെ ജിജു കുരുവിളയുടെയും (JK), ഷൈൻ ജോർജിന്റെയും ഉടമസ്ഥതയിലുള്ള പ്രശസ്ത മലയാളി റസ്റ്റോറന്റായ ‘മല്ലു കഫെ’ യിൽ എത്തിച്ചു.
അവിടെ ഷാലുവിൻ്റെ വിജയം ആഘോഷിക്കാൻ നിരവധി ആളുകൾ കാത്തു നിന്നിരുന്നു. ലളിതമായ അനുമോദന ചടങ്ങിന് സുനോജ് മല്ലപ്പള്ളി, ജിജു കുരുവിള, ഷൈൻ ജോർജ്, കൊച്ചുമോൻ വയലത്ത് എന്നിവർ നേതൃത്വം നൽകി. “അമേരിക്കൻ പ്രവാസ ലോകത്തെ ഫോമാ പ്രവർത്തകർ ഷാലുവിൽ അർപ്പിച്ച അചഞ്ചലമായ വിശ്വാസം വോട്ടായി ഒഴുകിയെത്തുമെന്നും, വൻ ഭൂരിപക്ഷം നേടി ഷാലു വിജയിക്കുമെന്നും ഞങ്ങൾക്ക് നൂറ് ശതമാനവും ഉറപ്പായിരുന്നു”. എന്ന് സുനോജ് മല്ലപ്പള്ളി പറഞ്ഞു, കൊച്ചുമോൻ വയലത്ത്, ജെ കെ ഓട്ടോ’ ഉടമ ജിജു കുരുവിള, വിനോദ്, ടിനു ചെറുകത്തറ, അലൻ ജോർജ്ജ്, ബ്ലെസ്സൻ, വിനയ്, നിധിൻ, എമിൽ, മനു, നന്ദു, സന്തോഷ്, റോയി, എന്നിവരും ആശംസകൾ അറിയിച്ചവരിൽ ഉൾപ്പെടുന്നു.
ഫോമ ഇലക്ഷൻ അപ്ഡേഷനുകൾ അപ്പപ്പോൾ തങ്ങൾക്ക് നൽകിയ ബെൻസൻ വർഗീസ് പണിക്കർ, റോയി അയിരൂർ, സജു വർഗീസ് എന്നിവരോടുള്ള നന്ദിയും സമ്മേളനത്തിൽ പങ്കുവച്ചു.
പണത്തിനും, പ്രതാപത്തിനും, സ്ഥാനമാനങ്ങൾക്കുമപ്പുറമാണ് ആത്മാർത്ഥതയുള്ള സൗഹൃദങ്ങൾ. അങ്ങനെവച്ച് നോക്കുമ്പോൾ ഞാൻ ഏറ്റവും വലിയ ഭാഗ്യവാനാണ്. ഈ സൗഹൃദങ്ങളാണ് എന്റെ ശക്തി. ഈ കറയറ്റ സൗഹൃദങ്ങളാണ് എന്റെ പ്രവർത്തന മേഖലയിലെ വിജയം. ഈ സൗഹൃദങ്ങളാണ് പ്രവാസ ലോകത്തെ എന്റെ ഏറ്റവും മികച്ച സമ്പാദ്യം. ഇലക്ഷനിൽ ഒരു സ്ഥാനാർത്ഥിയായി ഞാൻ മത്സരിക്കാൻ തീരുമാനിച്ച നിമിഷം മുതൽ ഈ നിമിഷം വരെ എന്നെ വിജയിപ്പിക്കുവാൻ എന്നോടൊപ്പം നിന്ന ഒരുപാട് കൂടപ്പിറപ്പുകൾപോലെയുള്ള സുഹൃത്തുക്കൾ എനിക്കുണ്ട്. അതിൽ, എനിക്കുവേണ്ടി പ്രചരണ സ്ഥലങ്ങളിലേക്ക് യാത്ര ചെയ്തവരുണ്ട്, എനിക്കുവേണ്ടി പലരോടും വോട്ട് ചോദിച്ചവരുണ്ട്, വോട്ടുകൾ ആവശ്യപ്പെട്ടുകൊണ്ടുള്ള മനോഹരങ്ങളായ ഇലക്ഷൻ പോസ്റ്ററുകൾ നിർമ്മിച്ച് സോഷ്യൽ മീഡിയാ വഴി ആളുകളിൽ എത്തിച്ച പലരുമുണ്ട്.. ആരുടേയും പേര് എടുത്തു പറയുന്നില്ല. അവർ എല്ലാം എന്നും എന്റെ ഉള്ളിൽ മങ്ങാതെ, മായാതെ എക്കാലവും എന്നോടൊപ്പം ഉണ്ടാവും. നിങ്ങൾ എന്നിൽ അർപ്പിച്ച വിശ്വാസവും, സ്നേഹവും, കരുതലും നഷ്ടപ്പെടാതെ എക്കാലവും ഞാൻ സൂക്ഷിക്കും. ഫോമയുടെ ഉന്നമനത്തിനുവേണ്ടി നിങ്ങളോടൊപ്പം ചേർന്ന് പ്രവർത്തിക്കും. എനിക്ക് വോട്ടു നൽകി വിജയിപ്പിച്ചവർക്കും, അതിനായ് പ്രവർത്തിച്ചവർക്കും, വിജയത്തിനായി പ്രാർത്ഥിച്ചവർക്കും ഹൃദയത്തിന്റെ ഭാഷയിൽ ഞാൻ നന്ദി പറയുന്നു- ഷാലു തന്റെ മറുപടി പ്രസംഗത്തിൽ വികാരാധീതനായി. മല്ലു കഫെ തയ്യാറാക്കിയ സ്വാദിഷ്ടമായ ഡിന്നറോടുകൂടി സ്വീകരണ പരിപാടികൽ അവസാനിച്ചു.
reception For Shalu Punnuse at Philadelphia
