പാലക്കാട്: കോണ്‍ഗ്രസില്‍ ചേര്‍ന്ന മുന്‍ ബിജെപി നേതാവ് സന്ദീപ് വാരിയര്‍ പാലക്കാട്ട് യുഡിഎഫ് സ്ഥാനാര്‍ഥി രാഹുല്‍ മാങ്കൂട്ടത്തിലിന്റെ റോഡ് ഷോയില്‍ സാന്നിധ്യമറിയിച്ചു. സ്ഥാനാര്‍ഥിയുടെ ജീപ്പിന് മുകളിലേക്ക് കയറിയ സന്ദീപ് പ്രവര്‍ത്തകരെ അഭിവാദ്യം ചെയ്യുകയും സ്ഥാനാര്‍ഥിക്കും കോണ്‍ഗ്രസ് നേതാക്കള്‍ക്കുമൊപ്പം ജീപ്പില്‍ റോഡ് ഷോയില്‍ പങ്കെടുക്കുകയും ചെയ്തു.
രാഹുല്‍ ഈ തിരഞ്ഞെടുപ്പില്‍ വലിയ ഭൂരിപക്ഷത്തില്‍ വിജയിക്കുമെന്നും ബിജെപിയുടെ ആയിരക്കണക്കിന് വോട്ടുകള്‍ കൈപ്പത്തി ചിഹ്നത്തില്‍ ലഭിക്കുമെന്നും സന്ദീപ് മാധ്യമങ്ങളോട് വ്യക്തമാക്കി.
കേവലം അസംബ്ലി ജയം മാത്രമല്ല ഉദ്ദേശിക്കുന്നതെന്നും മതേതരത്വത്തിന്റെ ആധികാരിക ജയമാണ് ലക്ഷ്യമിടുന്നതെന്നും രാഹുല്‍ മാങ്കൂട്ടത്തില്‍ പറഞ്ഞു. നിലപാട് മാറ്റി ഒരാള്‍ മതേതര ചേരിയോടൊപ്പം നിലയുറപ്പിക്കുന്നത് അതിന് ഉദാഹരണമാണ്. ഇത് സന്ദീപില്‍ ഒതുങ്ങില്ലെന്നും രാഹുല്‍ പറഞ്ഞു. വര്‍ഗീതയില്‍നിന്ന് ആരു പുറത്തുവരുന്നതും നാടിന് നല്ലതാണെന്ന് ഷാഫി പറമ്പിലും ജനാധിപത്യ ചേരിയിലേക്ക് കൂടുതല്‍ ആളുകള്‍ വരുന്നത് യുഡിഎഫിന് ഗുണം ചെയ്യുമെന്ന് ഹൈബി ഈഡന്‍ എംപിയും പറഞ്ഞു.
