
തിരുവനന്തപുരം: സംസ്ഥാനത്തെ കടകള് ഇന്ന് തുറന്നുപ്രവര്ത്തിക്കില്ല. വ്യാപാരി വ്യവസായി ഏകോപന സമിതിയുടെ നേതൃത്വത്തില് നടത്തുന്ന സമരത്തിന്റെ ഭാഗമായാണ് കടകള് അടച്ചത്.
സമരത്തിനു പിന്തുണ നല്കി ഹോട്ടലുകളും ഉള്പ്പെടെ രാവിലെ ആറുമുതല് വൈകിട്ട് ആറുവരെയാണ് അടച്ചിടുക. അതേസമയം, തിരുവനന്തപുരം നഗരത്തിലെ ഹോട്ടലുകളെ സമരത്തില് നിന്നും ഒഴിവാക്കിയിട്ടുണ്ട്.
വ്യാപാരവുമായി ബന്ധപ്പെട്ട നിയമങ്ങളും വകുപ്പുകളും ഏകോപിപ്പിച്ചു വ്യാപാരമന്ത്രാലയം രൂപവത്കരിക്കുക, മാലിന്യം നീക്കംചെയ്യാനില്ലാത്ത വ്യാപാരസ്ഥാപനങ്ങളെ യൂസര് ഫീ അടയ്ക്കുന്നതില്നിന്ന് ഒഴിവാക്കുക തുടങ്ങിയവയാണ് പ്രധാന ആവശ്യങ്ങള്. ഈ ആവശ്യങ്ങളുന്നയിച്ച് സംസ്ഥാന പ്രസിഡന്റ് രാജു അപ്സര നയിക്കുന്ന വ്യാപാരസംരക്ഷണ യാത്ര ചൊവ്വാഴ്ച തിരുവനന്തപുരത്ത് സമാപിക്കും. വ്യാപാരികള് അനുഭവിക്കുന്ന പ്രതിസന്ധികള് പരിഹരിക്കുന്നതിനു നടപടികള് സ്വീകരിക്കണമെന്നാവശ്യപ്പെട്ട് അഞ്ചുലക്ഷം വ്യാപാരികള് ഒപ്പിട്ട നിവേദനം ചൊവ്വാഴ്ച മുഖ്യമന്ത്രിക്ക് അദ്ദേഹം സമര്പ്പിക്കും.