കൊൽക്കത്ത: പശ്ചിമ ബംഗാളിലെ ക്രമസമാധാന നില മോശമാണെന്നും സംസ്ഥാനത്തിന്റെ അവസ്ഥ മണിപ്പൂരിനേക്കാൾ മോശമാണെന്നും ബിജെപി നേതാവ് ദിലീപ് ഘോഷ്.
“ബംഗാളിലെ സ്ഥിതി മണിപ്പൂരിനേക്കാൾ മോശമാണ്. സംസ്ഥാനത്ത് ഈ സർക്കാരിന് ജനങ്ങൾ വോട്ട് ചെയ്തു. അവർ ചെയ്യുന്ന കാര്യങ്ങൾക്ക് ജനങ്ങൾ തന്നെ അവരെ ശിക്ഷിക്കും. ക്രമസമാധാനപാലനത്തിന് നിർദ്ദേശങ്ങൾ നൽകുകയും സഹായം നൽകുകയും ചെയ്യുകയാണ് കേന്ദ്ര സർക്കാർ ചെയ്യുന്നത്. ബംഗാളിലെയും ബംഗ്ലാദേശ് അതിർത്തിയിലെയും സ്ഥിതി രാജ്യത്തിന്റെ സുരക്ഷയ്ക്ക് നല്ലതല്ല. ഞങ്ങൾ ഇത് പറഞ്ഞുകൊണ്ടിരുന്നു.”
ജനുവരി 5 വെള്ളിയാഴ്ച രാവിലെ പശ്ചിമ ബംഗാളിലെ നോർത്ത് 24 പർഗാനാസിലെ സന്ദേശ്ഖാലി ഗ്രാമത്തിൽ ഭരണകക്ഷിയായ തൃണമൂൽ കോൺഗ്രസിന്റെ (ടിഎംസി) ബ്ലോക്ക് തല നേതാക്കളുടെ വസതി റെയ്ഡ് ചെയ്യാൻ ശ്രമിച്ച എൻഫോഴ്‌സ്‌മെന്റ് ഡയറക്ടറേറ്റ് (ഇഡി) സംഘത്തിന് നേരെയുണ്ടായ ആക്രമണത്തിന് പിന്നാലെയാണ് ദിലീപ് ഘോഷിന്റെ പ്രതികരണം.
അതേസമയം, സംസ്ഥാനത്ത് ക്രമസമാധാന നില താളം തെറ്റിക്കിടക്കുകയാണെന്ന് ഈ ആക്രമണം തെളിയിക്കുന്നതായി പശ്ചിമ ബംഗാൾ കോൺഗ്രസ് അധ്യക്ഷൻ അധീർ രഞ്ജൻ ചൗധരി പറഞ്ഞു.
അന്വേഷണ ഏജൻസിയിലെ ഉദ്യോഗസ്ഥർക്കെതിരായ ആക്രമണം സംസ്ഥാന സർക്കാരും പോലീസ് സേനയും തമ്മിൽ അവിശുദ്ധ കൂട്ടുകെട്ടുണ്ടെന്ന് തെളിയിക്കുന്നതാണെന്ന് കോൺഗ്രസ് നേതാവ് പറഞ്ഞു.
“സന്ദേശ്ഖാലിയിൽ (ഗ്രാമത്തിൽ) സംഭവിച്ചതുപോലുള്ള ഒരു സംഭവം ഇന്ത്യയിൽ ഒരിടത്തും ഉണ്ടാകില്ല. വ്യാഴാഴ്ച നടന്ന സംഭവം ഗുണ്ടായിസത്തിന്റെ ഉദാഹരണമാണ്, ഇത് ഭരണകക്ഷിയും പോലീസ് സേനയും തമ്മിലുള്ള ബന്ധം തെളിയിക്കുന്നു. സംസ്ഥാനത്ത് ഈ അവിശുദ്ധ ബന്ധമാണ് ഈ സംഭവത്തിലൂടെ പ്രതിഫലിക്കുന്നത്,” ശനിയാഴ്ച വാർത്താ സമ്മേളനത്തിൽ കോൺഗ്രസ് നേതാവ് പറഞ്ഞു.
