ന്യൂഡൽഹി: പശ്ചിമ ബംഗാളിലെ സർക്കാർ-എയ്ഡഡ് സ്കൂളുകളിലെ 25,753 അധ്യാപകരുടെയും അനധ്യാപക ജീവനക്കാരുടെയും നിയമനം റദ്ദാക്കിയ ഏപ്രിൽ 22ലെ കൽക്കട്ട ഹൈക്കോടതി ഉത്തരവ് സുപ്രീം കോടതി ചൊവ്വാഴ്ച സ്റ്റേ ചെയ്തു. അഴിമതി ആരോപണത്തിൽ അന്വേഷണം തുടരാൻ സിബിഐയ്ക്ക് സുപ്രീം കോടതി അനുമതി നൽകിയെങ്കിലും സ്ഥാനാർത്ഥികൾക്കോ സർക്കാർ ഉദ്യോഗസ്ഥർക്കോ എതിരെ നിർബന്ധിത നടപടികളൊന്നും സ്വീകരിക്കരുതെന്ന് നിർദ്ദേശിച്ചു.
ചീഫ് ജസ്റ്റിസ് ഡി വൈ ചന്ദ്രചൂഡ്, ജസ്റ്റിസുമാരായ ജെ ബി പർദിവാല, മനോജ് മിശ്ര എന്നിവരടങ്ങിയ സുപ്രീം കോടതി ബെഞ്ച് കേസിൽ വേഗത്തിലുള്ള വാദം കേൾക്കാൻ ആവശ്യപ്പെടുകയും ജൂലൈ 16 ന് വാദം കേൾക്കാൻ ലിസ്റ്റ് ചെയ്യുകയും ചെയ്തു.
ബംഗാൾ സ്കൂളുകളിലെ 25,000-ത്തിലധികം അധ്യാപകരുടെയും അനധ്യാപക ജീവനക്കാരുടെയും ജോലി റദ്ദാക്കിയ കൽക്കട്ട ഹൈക്കോടതിയുടെ ഉത്തരവിനെ ചോദ്യം ചെയ്തുള്ള ഹർജികൾ പരിഗണിക്കുകയായിരുന്നു സുപ്രീം കോടതി. ഏകപക്ഷീയമായാണ് ഹൈക്കോടതി നിയമനങ്ങൾ റദ്ദാക്കിയതെന്ന് മമത ബാനർജിയുടെ നേതൃത്വത്തിലുള്ള ബംഗാൾ സർക്കാർ പറഞ്ഞു.
ജനങ്ങളുടെ വിശ്വാസം നഷ്ടപ്പെട്ടാൽ ഒന്നും അവശേഷിക്കില്ലെന്നും ഇത് വഞ്ചനയാണെന്നും കോടതി വിമർശിച്ചു. സർക്കാർ ജോലികൾ ഇന്ന് വളരെ വിരളമാണ്. ഇത്തരം നിയമനങ്ങൾ തെറ്റായ രീതിയിൽ നടക്കുകയാണെങ്കിൽ പിന്നെ എന്താണ് അവശേഷിക്കുക? ജനങ്ങൾക്ക് വിശ്വാസം നഷ്ടപ്പെടും. നിങ്ങൾക്കിത് അംഗീകരിക്കാൻ സാധിക്കുമോ?, ബംഗാൾ സർക്കാരിനോട് കോടതി ചോദിച്ചു. പരീക്ഷയുമായി ബന്ധപ്പെട്ട രേഖകൾ ഡിജിറ്റലായി സൂക്ഷിക്കാൻ നിങ്ങൾ ബാധ്യസ്ഥരായിരുന്നു. എന്നാൽ, ഈ രേഖകൾ ഇപ്പോൾ ഇല്ലെന്ന് വ്യക്തമാണെന്നും നിയമനങ്ങളിൽ സർക്കാരിന്റെ കൃത്യമായ മേൽനോട്ടം ഉണ്ടായിരിക്കണമെന്നും സുപ്രീം കോടതി വ്യക്തമാക്കി.
