ആഫ്രിക്കയ്‌ക്ക് പുറത്ത് മങ്കിപോക്‌സ് വൈറസ് ക്ലേഡ് 1 എന്ന പുതിയ വകഭേദം കണ്ടെത്തി. സ്വീഡനിലാണ് യൂറോപ്പിലെ ആദ്യത്തെ എംപോക്സ് കേസ് സ്ഥിരീകരിച്ചിരിക്കുന്നത്. സ്വീഡനിലെ പബ്ലിക് ഹെൽത്ത് ഏജൻസി ഇക്കാര്യം സ്ഥിരീകരിച്ചു. ആഫ്രിക്കൻ രാജ്യങ്ങളിൽ അതിവേഗം എംപോക്സ് പടരുന്ന സാഹചര്യത്തിത്തിൽ ലോകാരോഗ്യ സംഘടന ആരോഗ്യാടിയന്ഥരാവസ്ഥ പ്രഖ്യാപിച്ചിരുന്നു. ഇതിനു പിന്നാലെയാണ് യൂറോപ്പിൽ രോഗം സ്ഥിരീകരിച്ചിരിക്കുന്നത്.
എംപോക്‌സിന്റെ ക്ലേഡ് വണ്‍ രൂപാന്തരത്തെ തുടര്‍ന്നുള്ള രോഗബാധയാണ് സ്വീഡനില്‍ സ്ഥിരീകരിച്ചിരിക്കുന്നത്. ആഫ്രിക്കയിലെ നിലവിലെ എംപോക്സ് ബാധിതമായ മേഖല സന്ദര്‍ശിച്ചതാണ് രോഗബാധയ്ക്കു കാരണമെന്നാണ് സൂചന. രോഗിക്ക് ചികിത്സ ആരംഭിച്ചിട്ടുണ്ട്.
ക്ലേഡ് വണ്‍, ക്ലേഡ് ടു എന്നിങ്ങനെ എംപോക്‌സിന് പ്രധാനമായും രണ്ടു വകഭേദങ്ങളാണുള്ളത്. ക്ലേഡ് ടു മങ്കിപോക്‌സ് ബാധയെ തുടര്‍ന്ന് 2022-ല്‍ ലോകാരോഗ്യസംഘടന ആരോഗ്യ അടിയന്തരാവസ്ഥ പ്രഖ്യാപിച്ചിരുന്നു. ക്ലേഡ് വണ്ണിനെ അപേക്ഷിച്ച് ഭീകരത കുറവാണ് ക്ലേഡ് ടുവിന്. സ്വീഡന്‍ ഉള്‍പ്പെടെ നിരവധി രാജ്യങ്ങളില്‍ നേരത്തെതന്നെ ക്ലേഡ് ടു മങ്കിപോക്‌സ് സ്ഥിരീകരിച്ചിട്ടുണ്ട്.
