വാഷിംഗ്ടണ്‍: നമ്മുടെ സൗരയൂഥത്തിന്റെ അതിര്‍ത്തി ശാസ്ത്രജ്ഞര്‍ കണക്കാക്കിയതിനേക്കാള്‍ വളരെ വലുതാണെന്ന് പുതിയ കണ്ടെത്തല്‍. നാസയുടെ ന്യൂ ഹൊറൈസണ്‍സ് ബഹിരാകാശ പേടകത്തിന്റേതാണ് ഈ കണ്ടെത്തല്‍. ആസ്‌ട്രോഫിസിക്കല്‍ ജേണല്‍ ലെറ്റേഴ്‌സിലാണ് ഈ വിവരങ്ങള്‍ പ്രസിദ്ധീകരിച്ചത്.
പുതിയ കണ്ടെത്തലുകള്‍ അനുസരിച്ച്, നമ്മുടെ സൗരയൂഥത്തിന്റെ അതിര്‍ത്തി പ്ലൂട്ടോയില്‍ അവസാനിക്കുന്നില്ല. പകരം, അതിനെ വലയം ചെയ്യുന്ന കൈപ്പര്‍ ബെല്‍റ്റ് എന്നറിയപ്പെടുന്ന പാറകളുടെയും മഞ്ഞുപാളികളുടെയും വിശാലമായ ഒരിടത്തേക്കാണ് എത്തുന്നത്. സൗരയൂഥത്തിന്റെ പുറം അതിര്‍ത്തിയിലുള്ള കൈപ്പര്‍ ബെല്‍റ്റില്‍ ലക്ഷക്കണക്കിന് മഞ്ഞുപാളികള്‍, പാറകള്‍, കുള്ളന്‍ ഗ്രഹങ്ങള്‍, ധൂമകേതുക്കള്‍, മറ്റ് ചെറിയ വസ്തുക്കള്‍ എന്നിവ ഉള്‍പ്പെടുന്നുവെന്ന് ന്യൂ ഹൊറൈസണ്‍സ് വെളിപ്പെടുത്തി.
നെപ്റ്റിയൂണിന്റെ ഭ്രമണപഥത്തിനപ്പുറം സൗരയൂഥത്തിന് പുറത്തുള്ള ബഹിരാകാശത്തിന്റെ ഒരു വലിയ മേഖലയാണ് കൈപ്പര്‍ ബെല്‍റ്റ്. കൈപ്പര്‍ ബെല്‍റ്റിലെ ഏറ്റവും അറിയപ്പെടുന്നതും അംഗീകരിക്കപ്പെട്ടതുമായ കുള്ളന്‍ ഗ്രഹം പ്ലൂട്ടോയാണ്. ഭൂരിഭാഗം ഛിന്നഗ്രഹങ്ങളും ഉല്‍ക്കകളും ഈ ബെല്‍റ്റില്‍ നിന്നാണ് ഉത്ഭവിക്കുന്നത്.
കൈപ്പര്‍ ബെല്‍റ്റ് ഛിന്നഗ്രഹ വലയത്തിന് സമാനമാണ്, പക്ഷേ സൂര്യനില്‍ നിന്ന് വളരെ അകലെയാണ് ഇത് സ്ഥിതിചെയ്യുന്നത്, ഏകദേശം 30 ജ്യോതിശാസ്ത്ര യൂണിറ്റുകള്‍ (AU) മുതല്‍ സൂര്യനില്‍ നിന്ന് 50 AU വരെ വ്യാപിക്കുന്നു. ഭൂമിയും സൂര്യനും തമ്മിലുള്ള ശരാശരി ദൂരമാണ് ഒരു ജ്യോതിശാസ്ത്ര യൂണിറ്റ്. അതായത് ഏകദേശം 150 ദശലക്ഷം കിലോമീറ്റര്‍. ന്യൂ ഹൊറൈസണ്‍സ് സൂര്യനില്‍ നിന്ന് 45 മുതല്‍ 55 വരെ ജ്യോതിശാസ്ത്ര യൂണിറ്റുകള്‍ (AU) സഞ്ചരിച്ച് മൂന്ന് വര്‍ഷത്തിനുള്ളില്‍ ഫലങ്ങള്‍ സമാഹരിച്ചു.
