വാഷിംഗ്ടണ്: പകല് സമയം കൂടുതല് ലാഭിക്കുന്നതിനായി അമേരിക്ക സമയം ഒരുമണിക്കൂര് പിന്നോട്ടാക്കുന്നു. മാര്ച്ച് 10 മുതലാണ് അമേരിക്ക ഈ മാറ്റത്തിലേക്ക് കടക്കുന്നത്. ക്ലോക്കുകള് ഒരു മണിക്കൂര് പിന്നോട്ടാകുന്നതോടെ അമേരിക്കയുടെ ടൈംസോണില് മാറ്റംവരും.
വേനല് മാസങ്ങളില് സൂര്യപ്രകാശത്തിന്റെ ദൈര്ഘ്യമേറിയ സമയം പ്രയോജനപ്പെടുത്തുന്നതിനും പകല് കൂടുതല് ലാഭിക്കുന്നതിനുമായാണ് ക്ലാക്കുകള് ഒരു മണിക്കൂര് മുമ്പായി ക്രമീകരിച്ച് സമയം മാറ്റുന്നത്. ഇത്തരത്തിലുള്ള ക്രമീകരണ സമ്പ്രദായം യു.എസ് ആദ്യമായി ആരംഭിച്ചിട്ട് നൂറു വര്ഷത്തിലേറെയായിട്ടുണ്ട്. പകല് സമയം കൂടുതല് ലഭിക്കുന്നത് കുറ്റകൃത്യങ്ങളും റോഡപകടങ്ങളും കുറയ്ക്കാന് സഹായിക്കുന്നു എന്നാണ് വാദം. എന്നാല് ഇത് ആളുകളുടെ ആരോഗ്യത്തെ ദോഷകരമായി ബാധിക്കുമെന്നും ഉറക്കത്തെ തടസ്സപ്പെടുത്തുമെന്നും ഈ രീതിയിലെ സമയമാറ്റത്തോട് വിരോധമുള്ളവര് പറയുന്നു.
സണ്ഷൈന് പ്രൊട്ടക്ഷന് ആക്റ്റ് പോലെ വര്ഷത്തില് രണ്ടുതവണ ക്ലോക്കുകള് ക്രമീകരിക്കുന്ന രീതി അവസാനിപ്പിക്കാന് രാജ്യത്തുടനീളവും ഫെഡറല് തലത്തിലും നിയമനിര്മ്മാണം അവതരിപ്പിച്ചിട്ടുണ്ട്. എന്നാല് ഓരോ വര്ഷവും ദ്വൈവാര്ഷിക മണിക്കൂര് അങ്ങോട്ടും ഇങ്ങോട്ടും മാറ്റുന്നതില് മെനക്കെടാത്ത ചില സംസ്ഥാനങ്ങളുമുണ്ട്. ഹവായ്, അരിസോണയുടെ ഭൂരിഭാഗവും, പ്യൂര്ട്ടോ റിക്കോ, യുഎസ് വിര്ജിന് ദ്വീപുകള്, വടക്കന് മരിയാന ദ്വീപുകള്, ഗുവാം, അമേരിക്കന് സമോവ എന്നിവിടങ്ങളാണ് ഡേലൈറ്റ് സേവിംഗ് ടൈം (ഡിഎസ്ടി) ഇല്ലാത്ത യുഎസിന്റെ ഭാഗങ്ങള്. അരിസോണ 1918-ല് മാറ്റം പരീക്ഷിച്ചുവെങ്കിലും 1968-ല് സ്ഥിരമായി ഡിഎസ്ടി ഒഴിവാക്കാന് തീരുമാനിച്ചു. സ്റ്റാന്ഡേര്ഡ് ടൈം പാലിക്കുന്നുണ്ടെങ്കിലും വടക്കുകിഴക്കന് ഭാഗത്തുള്ള നേറ്റീവ് അമേരിക്കന് പ്രദേശമായ നവാജോ നേഷന് വര്ഷത്തില് രണ്ടുതവണ സമയമാറ്റം വരുത്തുന്നുണ്ട്.
പസഫിക്കിലെയും കരീബിയന് കടലിലെയും യുഎസ് പ്രദേശങ്ങളും ഈ രീതി പിന്തുടരാത്തതിന്റെ കാരണം, ഈ പ്രദേശങ്ങള് ഭൂമധ്യരേഖയോട് ചേര്ന്നാണ് സ്ഥിതി ചെയ്യുന്നത്, ഇത് വര്ഷം മുഴുവനും സൂര്യോദയത്തിലും അസ്തമയ സമയങ്ങളിലും കാര്യമായ വ്യത്യാസമില്ല. അതിനാല്, ക്ലോക്കുകള് ഒരു മണിക്കൂര് മുന്നോട്ടും പിന്നോട്ടും മാറ്റുന്നത് കൊണ്ട് ശ്രദ്ധേയമായ നേട്ടങ്ങളൊന്നുമില്ല.
മാര്ച്ച് 10, ഞായറാഴ്ച പ്രാദേശിക സമയം പുലര്ച്ചെ 2:00 മണിക്ക് ഡേലൈറ്റ് സേവിംഗ് സമയം ആരംഭിക്കുന്നു. ശനിയാഴ്ച രാത്രി നിങ്ങള് ഉറങ്ങാന് പോകുമ്പോള്, നിങ്ങളുടെ ക്ലോക്കുകള് ഒരു മണിക്കൂര് പിന്നിലേക്ക് സജ്ജീകരിക്കുക എന്നതാണ് ആദ്യമായി ചെയ്യേണ്ടത്. ഞായറാഴ്ച ഉണരുമ്പോഴേക്കും ടൈംസോണ് മാറിയിരിക്കും.
ടൈം സോണ് മാറുന്നതോടെ പിന്നീടുള്ള സൂര്യോദയങ്ങളിലും വ്യത്യാസം അനുഭവപ്പെടും സാധാരണ സമയത്തെ അപേക്ഷിച്ച് സൂര്യന് രാവിലെ ഒരു മണിക്കൂര് കഴിഞ്ഞ് ഉദിക്കും. വൈകുന്നേരങ്ങളില് അധിക മണിക്കൂര് പകല് വെളിച്ചം ആസ്വദിക്കാനാകുമെന്നും സാരം. ഇത് ജോലി അല്ലെങ്കില് സ്കൂളിന് ശേഷം കൂടുതല് ഔട്ട്ഡോര് ആക്ടിവിറ്റികള്ക്ക് ആളുകളെ സഹായിക്കും.
മിക്ക സ്മാര്ട്ട്ഫോണുകളും മറ്റ് ഇലക്ട്രോണിക് ഉപകരണങ്ങളും സമയമാറ്റത്തിനായി സ്വയമേ ക്രമീകരിക്കുന്നുണ്ട്. എന്നാല് അത്തരം ഓട്ടോമാറ്റിക് സംവിധാനം ഇല്ലാത്ത ഉപകരണങ്ങള് നിങ്ങള് സമയം മാറ്റി നല്കേണ്ടതുണ്ട്. നിങ്ങളുടെ വീട്ടിലെ ഏതെങ്കിലും അനലോഗ് ക്ലോക്കുകള്, ഓവന് ടൈമറുകള്, കാര് ക്ലോക്കുകള് അല്ലെങ്കില് മറ്റ് ഡിജിറ്റല് ഇതര സമയ സംവിധാനങ്ങള് എന്നിവ പരിശോധിച്ച് ക്രമീകരിക്കണം.
അതേസമയം, ശനിയാഴ്ച രാത്രി പതിവിലും അല്പ്പം നേരത്തെ ഉറങ്ങുന്നത് ഒരു മണിക്കൂര് ഉറക്കം നഷ്ടപ്പെടുന്നതില് നിന്നും സഹായിക്കും. നടക്കാന് പോയോ, പുറത്ത് ഒരു പിക്നിക് നടത്തിയോ, അല്ലെങ്കില് സൂര്യപ്രകാശം ആസ്വദിച്ചുകൊണ്ടോ നീണ്ട പ്രഭാതങ്ങളും സായാഹ്നങ്ങളും പ്രയോജനപ്പെടുത്തുകയാണ് പലരും ചെയ്യുക.
ഇത്തരത്തിലുള്ള ഡേലൈറ്റ് സേവിംഗ് സമയം ഈ നവംബര് 3 ഞായറാഴ്ച പ്രാദേശിക സമയം പുലര്ച്ചെ 2:00 മണിക്ക് അവസാനിക്കും. ക്ലോക്കുകള് പിന്നീട് ഒരു മണിക്കൂര് മുന്നിലേക്ക് സജ്ജീകരിക്കുകയും ഇത് സാധാരണ സമയത്തിലേക്കുള്ള മടക്കത്തിലേക്ക് നയിക്കുകയും ചെയ്യും.
പകല് സമയം ലാഭിക്കുന്നതിനുള്ള അമേരിക്കയുടെ ഈ സമ്പ്രദായം എപ്പോഴും ഒരു ചര്ച്ചാ വിഷയമാണ്, ചിലര് ഊര്ജ ലാഭം, സാമ്പത്തിക പ്രവര്ത്തനങ്ങള് എന്നിവയുടെ കാര്യത്തില് അതിന്റെ നേട്ടങ്ങള്ക്കായി വാദിക്കുമ്പോള് മറ്റുചിലരാകട്ടെ, ഉറക്ക തടസ്സത്തേയും, വര്ദ്ധിച്ച ട്രാഫിക് അപകടങ്ങളേയും കുറിച്ച് ആശങ്കപ്പെടുകയും അത്തരം പോരായ്മകളിലേക്ക് വിരല് ചൂണ്ടുകയും ചെയ്യുന്നുണ്ട്.
