പ്രതാപ്ഗഡ്: തൻ്റെ പിതാവിനെ കൊല്ലാൻ മൂന്ന് കൊലയാളികളെ വാടകയ്‌ക്കെടുത്ത 16 വയസ്സുകാരനെ പോലീസ് ശനിയാഴ്ച പിടികൂടി. വ്യാഴാഴ്ച പാട്ടി മേഖലയിൽ വ്യവസായി മുഹമ്മദ് നയീം (50) ബൈക്കിലെത്തിയ അക്രമികളുടെ വെടിയേറ്റ് മരിച്ചതിനു പിന്നാലെയാണ് സംഭവം.
അക്രമികളായ പിയൂഷ് പാൽ, ശുഭം സോണി, പ്രിയാൻഷു എന്നിവരെ അറസ്റ്റ് ചെയ്തതായി അഡീഷണൽ പോലീസ് സൂപ്രണ്ട് ദുർഗേഷ് കുമാർ സിംഗ് പറഞ്ഞു. ചോദ്യം ചെയ്യലിൽ, തങ്ങളെ കുറ്റകൃത്യത്തിന് നയീമിൻ്റെ മകൻ വാടകയ്‌ക്കെടുത്തതാണെന്ന് പ്രതികൾ പോലീസിനെ അറിയിച്ചുവെന്ന് പോലീസ് വ്യക്തമാക്കി.
“പിതാവിനെ കൊലപ്പെടുത്താൻ മൂന്നുപേരെ താൻ വാടകയ്‌ക്കെടുത്തതായും അവർക്ക് 6 ലക്ഷം രൂപ നൽകാമെന്ന് ഉറപ്പുകൊടുത്തതായും പ്രായപൂർത്തിയാകാത്ത ആൺകുട്ടി ഞങ്ങളോട് പറഞ്ഞു. പിതാവിനെ കൊന്നാൽ ബാക്കി തുക നൽകാമെന്ന ഉറപ്പിൽ 1.5 ലക്ഷം രൂപ അഡ്വാൻസ് നൽകി,” ഉദ്യോഗസ്ഥൻ പറഞ്ഞു.
ആവശ്യത്തിന് പണം നൽകാത്തതിനാൽ മകൻ മുഹമ്മദ് നയീമിനോട് ദേഷ്യപ്പെട്ടിരുന്നതായി പോലീസ് പറഞ്ഞു.
“തൻ്റെ ആവശ്യങ്ങൾ നിറവേറ്റുന്നതിനായി കടയിൽ നിന്ന് പണമോ വീട്ടിൽ നിന്ന് ആഭരണങ്ങളോ മോഷ്ടിക്കാറുണ്ടെന്ന് ആൺകുട്ടി പറഞ്ഞു. പിതാവിനെ കൊല്ലാൻ മുമ്പ് പദ്ധതിയിട്ടിരുന്നെങ്കിലും പരാജയപ്പെട്ടു,” ഓഫീസർ പറഞ്ഞു.
പ്രായപൂർത്തിയാകാത്തയാളെ ജുവനൈൽ സെൻ്ററിൽ പ്രവേശിപ്പിച്ചു. അറസ്റ്റ് ചെയ്ത മൂന്നുപേരെയും പോലീസ് ജയിലിലേക്ക് അയച്ചു.
