വാഷിങ്ടൺ: അമേരിക്കയിലെ ഖലിസ്ഥാൻ വിഘടനവാദി നേതാവ് ഗുർപത്വന്ത് സിങ് പന്നൂനിനെ വധിക്കാൻ ഗൂഢാലോചന നടത്തിയ ഇന്ത്യൻ ഉദ്യോഗസ്ഥൻ റോയിലെ (റിസർച്ച് ആൻഡ്‌ അനാലിസിസ് വിങ്) വിക്രം യാദവാണെന്ന് ‘വാഷിങ്ടൺ പോസ്റ്റ്’ പത്രം. റോയുടെ അന്നത്തെ തലവനായിരുന്ന സുമന്ത് ഗോയലിന്റെ അനുമതിയോടെയായിരുന്നു ഇതെന്നും പത്രം പ്രസിദ്ധീകരിച്ച റിപ്പോർട്ടിൽ പറയുന്നു. ഇന്ത്യ ഭീകരനായി പ്രഖ്യാപിച്ചിട്ടുള്ളയാളാണ് പന്നൂൻ.
തങ്ങളുടെ ലേഖനത്തോട് പ്രതികരിക്കാൻ വിദേശകാര്യ മന്ത്രാലയം വിസമ്മതിച്ചതായി വാഷിംഗ്ടൺ പോസ്റ്റ് അവകാശപ്പെട്ടു. ന്യൂഡൽഹി, വാഷിങ്ടൺ, ഒട്ടാവ, ലണ്ടൻ, പ്രാഗ്, ബെർലിൻ എന്നിവിടങ്ങളിലെ ഉദ്യോഗസ്ഥരും വിദഗ്‌ധരുമുൾപ്പെടെയുള്ളവരുടെ അഭിമുഖത്തിന്റെ അടിസ്ഥാനത്തിലാണ് അന്വേഷണ റിപ്പോർട്ട് തയ്യാറാക്കിയതെന്ന് ‘വാഷിങ്ടൺ പോസ്റ്റ്’ പറയുന്നു.
2022 നവംബറിൽ, ഫിനാൻഷ്യൽ ടൈംസിലെ ഒരു റിപ്പോർട്ടിൽ, പന്നൂനെ കൊല്ലാനുള്ള ഗൂഢാലോചന അമേരിക്ക പരാജയപ്പെടുത്തിയതായി പ്രസ്താവിച്ചിരുന്നു. പന്നൂനെ ഉന്മൂലനം ചെയ്യാനുള്ള ഗൂഢാലോചനയിൽ ന്യൂഡൽഹി ഉൾപ്പെട്ടിട്ടുണ്ടെന്ന ആശങ്കയിൽ യുഎസ് ഇന്ത്യൻ സർക്കാരിന് മുന്നറിയിപ്പ് നൽകിയതായും റിപ്പോർട്ട് അവകാശപ്പെട്ടു.
യുഎസ് രഹസ്യാന്വേഷണ ഏജൻസിയായ സിഐഎയും എഫ്ബിഐയും മറ്റ് ഏജൻസികളും നടത്തിയ അന്വേഷണത്തിൽ ഇന്ത്യൻ പ്രധാനമന്ത്രി നരേന്ദ്രമോദിയുടെ അടുപ്പക്കാരുമായി വധഗൂഢാലോചനയ്ക്കു ബന്ധമുണ്ടെന്ന് കണ്ടെത്തിയതായി റിപ്പോർട്ടിലുണ്ട്. മോദിയുടെ ദേശീയ സുരക്ഷാ ഉപദേഷ്ടാവ് അജിത് ഡോവലിന് ഇക്കാര്യം അറിയാമായിരുന്നു എന്നാണ് സിഐഎയുടെ വിലയിരുത്തൽ. എന്നാൽ, ഇതിന് കൃത്യമായ തെളിവു ലഭിച്ചിട്ടില്ലെന്ന് സിഐഎ ഉദ്യോഗസ്ഥർ പറഞ്ഞു.
കഴിഞ്ഞവർഷം ജൂണിൽ മറ്റൊരു ഖലിസ്ഥാൻ നേതാവ് ഹർദീപ് സിങ് നിജ്ജർ കാനഡയിൽ കൊല്ലപ്പെട്ടതിനു പിന്നാലെയാണ് പന്നൂൻ വധഗൂഢാലോചന പുറത്തുവന്നത്. ഇതിന്റെ പേരിൽ ഇന്ത്യൻപൗരനായ നിഖിൽ ഗുപ്തയെ യു.എസിന്റെ ആവശ്യപ്രകാരം ചെക്കസ്ലൊവാക്യ അറസ്റ്റുചെയ്തിരുന്നു. ഇയാൾ ഇപ്പോഴും അവിടെ ജയിലിലാണ്.
എന്നാൽ, പന്നൂനെ കൊലപ്പെടുത്താനുള്ള ഗൂഢാലോചന ‘സർക്കാർ നയത്തിന് വിരുദ്ധമാണ്’ എന്ന് പറഞ്ഞുകൊണ്ട് നേരത്തെ പുറത്തുവന്ന അമേരിക്കയുടെ ആരോപണങ്ങളെ ഇന്ത്യ ശക്തമായി നിഷേധിച്ചിരുന്നു. പന്നൂൻ വധ ഗൂഢാലോചന ആരോപണങ്ങൾ അന്വേഷിക്കാൻ 2023 നവംബർ 18 ന് സർക്കാർ ഉന്നതതല അന്വേഷണ സമിതിയും രൂപീകരിച്ചു.
