ഹമാസിന്റെ രാഷ്ട്രീയകാര്യ ഉപമേധാവി സാലിഹ് അൽ അറൂരി കൊല്ലപ്പെട്ടതോടെ പശ്ചിമേഷ്യ സംഘർഷ ഭരിതം. യുദ്ധം വ്യാപിച്ചേക്കാമെന്ന ഭീതിയിലാണ് ലോകം. ഇന്നലെ ഇസ്രയേൽ ലെബനൻ അതിർത്തിയിൽ നടത്തിയ ആക്രമണത്തിൽ പ്രാദേശിക ഹിസ്ബുള്ള ഉദ്യോഗസ്ഥനായ ഹുസൈൻ യാസ്ബെക്കും സംഘത്തിലെ മറ്റ് എട്ട് അംഗങ്ങളും കൊല്ലപ്പെട്ടു. ഇതോയെ ഹമാസിനൊപ്പം ഹിസ്ബുല്ലയും ഇസ്രയേലിനോട് യുദ്ധം പ്രഖ്യാപിച്ചു.
‘തന്റെ പോരാളികൾ യുദ്ധത്തെയും മരണത്തെയും ഭയപ്പെടുന്നില്ലെന്നാണ്’ ഹമാസ് നേതാവ് കൊല്ലപ്പെട്ടതിന് ശേഷമുള്ള ആദ്യത്തെ പരസ്യപ്രസ്താവനയിൽ ഹിസ്ബുള്ള നേതാവ് ഹസൻ നസ്രല്ല പ്രഖ്യാപിച്ചത്.
ഇറാന്റെ പിന്തുണയുള്ള സായുധസംഘമാണ് ഹിസ്ബുള്ള. ഹിസ്ബുള്ളയുടെ ശക്തികേന്ദ്രമാണ് ലെബനൻ. ഹമാസ് നേതാവ് സാലിഹ് അൽ അറൂരിയുടെ കൊലപാകത്തിൽ തിരിച്ചടിക്കുമെന്ന് പ്രഖ്യാപിച്ചതോടെയാണ് സംഘർഷങ്ങൾ ഗാസയ്ക്കു പുറത്തേക്ക് വ്യാപിക്കാനുള്ള സാധ്യതകൾ ശക്തമായത്. തങ്ങളുടെ ശക്തി കേന്ദ്രമായ ദഹിയേയിൽ ആക്രമണം നടത്തിയത് ഇസ്രയേലാണെന്നും ആക്രമണം ലെബനന്റെ പരമാധികാരത്തിന് മേലുള്ള കടന്നാക്രമണമാണെന്നും ആരോപിച്ച് ഹിസ്ബുള്ള രംഗത്തെത്തി.
ലെബനനെ ഏറ്റുമുട്ടലിലേക്ക് വലിച്ചിഴയ്ക്കാനാണ് ഇസ്രയേൽ ശ്രമിക്കുന്നതെന്ന് ലെബനൻ പ്രധാനമന്ത്രിയും ആരോപിച്ചിരുന്നു. ഹിസ്ബുള്ള ആക്രമണം കടുപ്പിച്ചാൽ ലെബനനെ ഗാസയാക്കുമെന്ന ഭീഷണി മുന്നറിയിപ്പ് മുൻപ് ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹു നടത്തിയിരുന്നു.
അതേസമയം, ഇസ്രയേൽ ഏത് ആക്രമണത്തെയും പ്രതിരോധിക്കാനും അതിനെ ശക്തമായി തിരിച്ചടിക്കാനും സജ്ജമാണെന്ന് ഇസ്രയേൽ സൈനിക വക്താവ് ഡാനിയൽ ഹഗാരി വ്യക്തമാക്കി.
യുഎസ് ആക്രമണത്തില്‍ കൊല്ലപ്പെട്ട റവല്യൂഷണറി ഗാര്‍ഡ് ജനറല്‍ ഖാസിം സുലൈമാനിയുടെ അനുസ്മരണാ ചടങ്ങിനിടെയുണ്ടായ ഇരട്ട ബോംബ് സ്ഫോടനങ്ങളില്‍ ഇസ്രയേലിനെയും യുഎസിനെയും കുറ്റപ്പെടുത്തി ഇറാനും രംഗത്തെത്തിയിട്ടുണ്ട്..
War like situation in Middle East Hezbollah joins hands with Hamas
